12 февраля 2011 г.
Нарăсăн 9-мĕшĕнче «Каçал ен» район хаçачĕн коллективĕ хаçатăн 80 çулхи юбилейне паллă турĕ.
Уява район пуçлăхĕ Евгений Иванович Карпеев, районти культура ĕçченĕсен профсоюз райкомĕн председателĕ Мария Васильевна Мокеева, РФ Пенси фончĕн районти управленийĕн начальникĕ Сергей Валериевич Горбунов тата ыттисем те хутшăнчĕç.
Чи малтанах Евгений Иванович районăн социаллă-экономикăлла аталанăвне тÿпе хывнăшăн тата 80 çулхи юбилей ячĕпе редакци коллективне район администрацийĕн Хисеп грамотине парса чысларĕ.
«Эсир Каçал ене ăнăçлă аталанма пулăшакан вăй. Хаçатсăр пурнăç çук. Малашне те çĕнĕ хыпарсене тĕрĕс те объективлă çутатăр»,— терĕ район пуçлăхĕ коллектива ырлăх-сывлăх сунса.
Редакцин тĕп бухгалтерĕ Т.В.Мамуткина ĕçри тăрăшулăхшăн Чăваш Республикин Культура, национальноçсен ĕçĕсен, информаци политикин, архив ĕçĕн министерствин Хисеп грамотине тивĕçрĕ.
Çавăн пекех культура работникĕсен профсоюз райкомĕн председателĕ М.В.Мокеева редакцие хаклă парне тата профсоюз членĕсене — О.Николаевăна, Л.Бариновăна, М.Илларионовăна, М.Гафуровăна, В.Тимофеева Хисеп хучĕсем тата парнесем пачĕ.
Хаçат редакцийĕн коллективне саламлама Йĕпреç, Патăрьел тата Хĕрлĕ Чутай район хаçачĕсен ĕçченĕсем те сумлă парнесемпе килсе çитрĕç.
Уява çавăн пекех редакцире чылай çул ĕçлесе тивĕçлĕ канăва тухнă В.А.Чубаев, В.В.Гаврилов, В.С.Воробьева, Н.К.Скворцов, В.Н.Григорьев, З.Н.Соловьева ветерансем хутшăнчĕç.
Источник: "Каçал Ен"