09 февраля 2011 г.
Паянхи кун районти пушар хуралĕнче 20 çын ытла вăй хурать. Кунсерен унта вăтамран 3—4 çын дежурствăра хăйсен тивĕ-çĕсене пурнăçлать. Вут-çулăм тухсан тÿрех çула тухаççĕ, инкекрен çынсене çăлаççĕ. Пурлăха упраса хăвараççĕ.
Пушар хуралĕн 31-мĕш пайĕн ĕçченĕсемшĕн иртнĕ тунти кун чăн-чăн уяв пулчĕ. Çак кун савăнăçлă лару-тăрура «Чăваш Республикин пушара хирĕç кĕрешекен служби» ПУ начальникĕ В.Ф.Игнатьев унта ĕçлекенсене «Участникам ликвидации пожаров в 2010 году» медальсем парса чысларĕ. Наградăсене илме районти пушар хуралĕн республикăн тĕрлĕ вырăнĕсенче вăрман сÿнтерсе палăрнă ĕçченсем тивĕç пулнă. Вĕсем: Иван Николаевич Порфирьевпа Андрей Владимирович Прохоров караул начальникĕсем, Алексей Владимирович Шемекеев, Александр Сергеевич Самарин, Герман Николаевич Крылов, Андрей Сергеевич Самарин, Николай Николаевич Лупов, Анатолий Федорович Тихонов, Андрей Николаевич Жуков, Сергей Петрович Жуков, Николай Витальевич Мамуткин, Сергей Павлович Краснов пушар хуралĕн ĕçченĕсем.
Шупашкартан килнĕ начальнике ĕçченсем куллен-кун тĕл пулакан лару-тăрупа çыхăннă ыйтусем те пачĕç. Пĕрин удостоверенийĕ срокран тухнă, теприн — техникăн сапас пайĕсем. Валерий Филимонович пурин çине те тулли хурав пачĕ. Çавăн пекех мероприятие район администрацийĕн гражданла оборона тата чрезвычайлă ситуацисен тĕп специалисчĕ Н.А.Хайруллов та хутшăнчĕ.
Источник: "Каçал Ен"