19 января 2011 г.
Зульфия Азизова Патăрьел районĕнче çуралса ÿснĕ. Ачаранпах шурă халатлă ĕçчен пулма ĕмĕтленнĕ хĕрача. Йышлă çемьере ÿснĕскер, яланах пĕлÿ патне ăнтăлнă, шкулта лайăх паллăсемпе кăна ĕлкĕрсе пынă. «Шкула шурă халатлă ĕçченсем тĕрĕслеме пырсан ăмсанса пăхаттăм. Манăн та ÿссе çитсен çак ĕçре ĕçлес кăмăл çуралчĕ»,— терĕ Зульфия Газымовна.
Вăл вăтам пĕлÿ илсен Ульяновскри медицина училищине çул тытнă. Шкулта аван вĕреннĕскер, училищĕре те лайăх паллăсемпе ĕлкĕрсе пынă. Пултаруллă студентка вĕренÿре кăна мар, спортра та малтисен ретĕнче пулнă, ыттисем те ун пек пулма тăрăшнă.
1987 çулта, алла диплом илсен, районти тĕп больницăра ĕçлеме пикенет. Паянхи кунччен те З.Азизова çакăнтах тăрăшать.
Зульфия Газымовна пирки ĕçтешĕсем те, сипленме килнисем те ăшă сăмахсем кăна калаççĕ. Ахальтен мар ĕнтĕ ăна районти тĕп больница администрацийĕ нумай хутчен Хисеп грамотисем парса чысланă.
Медицина ĕçченĕ Урмаел каччипе, Гумер Азизовпа, 1988 çулта паллашса пĕр çемье çавăрать. Пултаруллă та ĕçчен мăшăр çурт лартать, ача-пăча ÿстерет. Хĕрĕ Лейсан Хусанти фармаци колледжĕнчен вĕренсе тухнă. Çемйипе çак хуларах тĕпленнĕ. Ывăлĕ Линар Урмаел вăтам шкулĕнче 8-мĕш класра вĕренет. Сывă пурнăç йĕркипе пурăнакан Гумер Шайметдинович ывăлне те çавнах хăнăхтарать, пурнăçра тĕрĕс пурăнма вĕрентет.
Азизовсене пĕр мăнук савăнтарать. «Унран хакли çĕр çинче çук та пулĕ»,— теççĕ харăсах Зульфия Газымовнăпа мăшăрĕ.
Урмаелĕнче Азизовсем хăйсен тăрăшулăхне, сăпайлăхне пула ял-йышра, кÿршĕ-аршăра пысăк хисепре.
Источник: "Каçал Ен"