31 декабря 2010 г.
2010 çул, тигр çулталăкĕ, хыçала юлчĕ. Районта, республикăра, çĕр-шывра тĕрлĕ улшăнусем, çĕнĕлĕхсем пулчĕç.
Тигр хăйĕн каварлăхне кăтартрĕ пулмалла. Халăх умне çут çанталăк пысăк чăрмавсем кăларса тăратрĕ. Чылай вăхăт шăрăх тăни, уй-хир культурисен пĕчĕк тухăçĕ, вăрмансенчи пушарсем... Çапах та ырри ытларах пулнă. Район хаçачĕ яланхи пекех пурнăçпа пĕр тан утма тăрăшрĕ. Пире ку енĕпе обществăлла корреспондентсем, юнкорсем, специалистсем пулăшса пычĕç.
Чи малтанах пирĕн чи çывăх тус, Р.П.Моисеев пирки асăнас килет. Вăл çырнă проблемăллă статьясем, пурнăçăн тÿнтер енне сăнлакан хайлавĕсем тăтăшах пичетленсе пычĕç. А.Агафонов, А.Кокорев, Г.Любимова, А.Ежергина тата ытти ялкорсем çыхăну тытса тăчĕç.
Районти ял хуçалăх пайĕн специалисчĕсен К.Гимальдиновăн, И.Минетуллинăн, Н.Чернован статйисене вулакансем хапăлласах йышăнчĕç пулĕ. Р.Велимухаметов выльăх-чĕрлĕх чирĕсем, М.Пильщикова хурт-хăмăр пирки каласа паракан материалсем тăтăшах çырчĕç.
2010 çул Вĕрентекен çулталăкĕ пулчĕ. Районта ку тĕлĕшпе ирттернĕ пур мероприяти пирки те хаçат страницисенче çутатса тăнă. Ку тĕлĕшпе шкулсенчи вĕрентекенсемпе вĕренекенсем, районти вĕрентÿ пайĕн специалисчĕсем — А.Яковлев, Т.Долгова, В.Кириллов, Г.Гадельянова тĕрлĕ хыпарсем пĕлтерсех тăнă. Библиотека ĕçченĕсем М.Мокеева, Г.Зайнуллина, А.Волкова, В.Боровкова вулавăшсенче йĕркеленĕ мероприятисем çинчен пĕлтернĕ.
Прокуратурăра, судра, шалти ĕçсен пайĕнче, ГИБДДра тăрăшакансене те тăтăшах сăмах панă. В.Гришин, Е.Илларионов, А.Григорьев, И.Зарубина, Р.Шайхалов, А.Эткеров, Н.Райков, А.Левый районти криминаллă лару-тăрупа, преступноçа хирĕç пурнăçланă профилактика ĕçĕсемпе паллаштарсах тăнă.
Халăха ĕçпе тивĕçтерес енĕпе ĕçлекен центр ертÿçи Н.Антонов, Н.Мадюкова, больницăри медработниксем Н.Краснова, Л.Ярышева, Н.Минетуллина, З.Юнусова та пичете чылай материал панă.
Е.Тихонов, А.Пундяков тата С.Остопиенко, тĕпрен илсен, хăйсен статйисенче физкультурăпа спорт, сывă пурнăç йĕрки çинчен сăмах хускатнă, спортсменсен çитĕнĕвĕсемпе паллаштарсах тăнă.
Тĕрлĕ шайри специалистсем В.Шингалова, Р.Суратова, В.Мамуткин, Н.Розова, В.Гордеев, Р.Розова хаçатпа туслă çыхăну тытнă.
Шел, шкулсенче вĕренекенсенчен иртнĕ çул заметкăсем сахалрах пулчĕç. Малашне вĕсем пултаруллăрах пуласса шанатпăр.
2010 çулта Тăван çĕр-шывăн Аслă вăрçинче çĕнтернĕренпе 65 çул, Чăвашпотребсоюза туса хунăранпа 90 çул çитрĕ. Çак паллă уявсемпе çыхăнтарнă хайлавсем хаçатра нумай пичетленчĕç. Кăçал вара район хаçачĕ кун çути курнăранпа 80 çул çитет. Ялкорсем, хаçат тусĕсем 2011 çулта яланхи пекех пултаруллă пуласса, вулакансене интереслĕ статьясемпе, заметкăсемпе савăнтарасса шанса тăратпăр. Пирĕн хаçата вулакансем патне вăхăтра илсе çитерекен почтальонсене ырă сăмах калатпăр.
Сире пурсăра та Çĕнĕ çул тата Раштав уявĕсен ячĕсемпе саламлатпăр. Пурнăçра ăнăçу çеç сунатпăр. Ĕмĕтĕрсем çитсе пыччăр, вăрăм ĕмĕр-лĕ пулăр.
Источник: "Каçал Ен"