25 декабря 2010 г.
Кăçал, декабрь уйăхĕнче, Раççей Федерацийĕн Пенси фондне туса хунăранпа 20 çул çитрĕ. Пирĕн районти управлени ĕçченĕсем те пенси шутласа парас, палăртас енĕпе тăрăшаççĕ, страховательсем вăхăтра взноссем куçарччăр тесе тĕрĕслесех тăраççĕ. Ĕçĕ питĕ нумай вĕсен, çапах уяв тума та майсем тупаççĕ. Çирĕм çул нумаях та мар пек, çапах, каялла çаврăнса пăхсан, хыçра туса ирттернĕ ĕçсем нумай юлнă, аса илмелли те пурах. Çак çавра датăна Пенси фончĕн ĕçченĕсем декабрĕн 21-мĕшĕнче районти культурăпа кану центрĕнче паллă турĕç. Хăнана ветерансене, пĕрле тачă ĕçлекен страховательсене, ĕçри партнерсене чĕннĕ. Малтанах Пенси фончĕн районти управленийĕн начальникĕ Сергей Горбунов хăйсен ĕç-хĕлĕпе паллаштарчĕ. Район пуçлăхĕ Евгений Карпеев пурне те уяв ячĕпе саламларĕ, ăнăçусем сунчĕ. Ĕçре палăрнисем, Г.И.Сорокина ветеран, З.В.Каринкина Хисеп грамотисем илме тивĕç пулчĕç. «Нур» СППК тата «Труд» ЯХПК ертÿçисене Закир Заргировпа Василий Николаева чи лайăх страхователь пулнăшăн Тав çырăвĕ пачĕç. Пенси тематикине хаçат страницисенче тăтăшах та тĕрлĕ енлĕн çутатнăшăн «Каçал ен» хаçат редакцине те Сергей Валерьевич Тав çырăвĕпе чысларĕ.
Пенси фончĕн ĕçченĕсене перекет банкĕн районти уйрăмĕн управляющийĕ Елена Кополухина, социаллă хÿтлĕх пайĕн заведующийĕ Ираида Никитина, страхлакан больница кассин представителĕ Зинаида Галкина, районти ветерансен совечĕн председателĕ Юрий Тимофеев саламларĕç. Çак структурăсем пĕр-пĕринсĕр ĕçлеймеççĕ тесен те йăнăш пулмасть. Çавăнпа вĕсем пĕрмаях тачă çыхăну тытаççĕ.
Çак кун Комсомольски 1-мĕш вăтам шкулĕн вĕренекенĕсем те Дипломсем илчĕç. Пысăк чыса пенси темипе çыхăннă сочиненисен конкурсĕнче палăрнисем тивĕçрĕç. Вĕсен учителĕсем те ăшă сăмахсем илтрĕç.
Пенси фончĕн ĕçченĕсем юрă-ташăра та маттур иккен. Уяв ячĕпе хатĕрленĕ номерсене сотрудниксем питĕ интереслĕ, хаваслă кăтартса пачĕç. Ачасен районти искусство шкулĕн воспитанникĕсем те юрă-ташăпа савăнтарчĕç.
Источник: "Каçал Ен"