18 декабря 2010 г.
Декабрĕн 15-мĕшĕнче республикăра черетлĕ Пĕрлехи информаци кунĕ иртрĕ. Комсомольски районне Чăваш Республикин культура, национальноçсен ĕçĕсен, информаци политикин тата архив ĕçĕн министрĕ Р.М.Лизакова ертсе пыракан ушкăн килчĕ. Район администрацийĕн пуçлăхĕн кабинетĕнче канашланă хыççăн информушкăнсем Комсомольски, Александровка, Чĕчкен, Хирти Сĕнтĕр ял поселенийĕсене тухса кайрĕç.
Предприятисемпе ĕç коллективĕсенче ирттернĕ тĕл пулусенче Информкунăн тĕп темисемпе калаçусем пулнă. Вĕсем: РФ Президенчĕ Д.Медведев Федераллă Собрание тата ЧР Президенчĕ М.Игнатьев Патшалăх Канашне янă Çырусенчи тĕп положенисене пурнăçа кĕртесси, «Раççей Федерацийĕнчи вĕрентÿ çинчен» федераллă саккунăн проектне сÿтсе явасси.
Роза Лизаковăпа район администрацийĕн пуçлăхĕ Геннадий Волков пирваях Комсомольски ял поселенийĕнчи культура учрежденийĕсен ĕçĕпе паллашрĕç. Районти культурăпа кану центрĕнче пулнă май Геннадий Федорович çак çурта çитес çулсенче реконструкци тăвасси çинчен сăмах пуçарчĕ. Проект эскизĕ хатĕр ĕнтĕ, смета хатĕрлесе ăна укçа-тенкĕпе тивĕçтерме майсем тупмалла.
Комсомольскинчи ачасен искусство шкулне йышлăн çÿреççĕ. Пĕрисем ташлаççĕ, юрлакансем пур, теприсем тата тĕрлĕ ал ĕç тума, ÿкерме кăмăллаççĕ. Ăста преподавательсем ертсе пынипе çамрăк ăру тĕрлĕ искусство никĕсне алла илет. Учреждени директорĕ Ферит Гибатдинов ачасем валли кунта пÿлĕмсем çитменни пирки каларĕ.
Çĕнĕ Кипеçри В.Агамирян предпринимателĕн сыр заводĕнчи тĕл пулу та интереслĕ, усăллă иртрĕ. Кунта ĕçлекенсем информушкăн членĕсене тимлесе итлерĕç, ыйтусем пачĕç. Çĕнĕ Кипеçре тĕрлĕ сыр кăлараççĕ, вĕсене хамăр республикăра çеç мар, тĕрлĕ регионсенче те хапăлласах туянаççĕ. Вадим Агамирян хăнасене тутлă сырăн технологийĕпе тĕплĕн паллаштарчĕ, цехсене кăтартрĕ. Çак экскурси хыççăн вĕсен продукцине çынсем мĕншĕн кăмăлласа туяннин сăлтавĕ те çиеле тухрĕ – унта тĕрлĕ хутăшсем ямаççĕ, таса сĕтрен тата тутлантаракан хутăшсенчен çеç хатĕрлеççĕ.
Чăваш Республикин физкультура, спорт тата туризм министрĕн çумĕ Алексей Яковлев ушкăнĕ Александровка ял поселенийĕнче пулчĕ, çавăн пекех Комсомольскинчи физкультурăпа спорт комплексĕн строительстви мĕнле пынипе паллашрĕ.
Чăваш Республикин Патшалăх Канашĕн депутачĕ, «Чăвашрегионгаз» ООО Генеральнăй директорĕ К.С.Мифтахутдинов, «Слава картофелю» компанин генеральнăй директорĕ А.П.Капитонов, чăваш халăх поэчĕ В.Туркай, район администрацийĕн ял хуçалăх пайĕн тĕп агрономĕ И.Х.Минетуллин Чĕчкен ял поселенийĕнче пулчĕç. Аслă Чурачăкри социаллă-культурăллă центрта ял халăхĕпе, вĕренекенсемпе, вĕрентекенсемпе тĕл пулчĕç. Калаçу Раççей Федерацийĕн тата Чăваш Республикин Президенчĕсен Çырăвĕсем тавра иртрĕ. Экономика, социаллă пурнăç, культура, вĕрентÿ, халăха медицина пулăшăвĕ парас ыйтусене хускатрĕç. Уйрăмах «Раççей Федерацийĕн вĕрентÿ çинчен» çĕнĕ саккунăн проекчĕ пирки ытларах чарăнса тăчĕç. В.Туркай ял библиотекине тата шкула кĕнекесем парнелерĕ. Информаци кунне килнисем халăх ыйтăвĕ çине хуравларĕç.
Источник: "Каçал Ен"