11 декабря 2010 г.
Декабрĕн 9-мĕшĕнче районти культурăпа кану центрĕнче эстрада юррисен «Кĕтне кĕввисем» фестиваль-конкурсĕ иртнĕ. Унта уйрăм юрăçсем те, вокал ансамблĕсемпе дуэтсем те хутшăннă. Юрăçсем икĕ ÿсĕм категорийĕнче тупăшнă – 14 çула çитичченхисем тата 14—17 çултисем.
Кĕçĕн ушкăнра Комсомольскинчи Ксения Гришина пĕрремĕш вырăна тухнă. Иккĕмĕшĕнче вара — Людмила Миронова (Хирти Мăнтăр). Хирти Сĕнтĕртен килнĕ Кристина Вишнева – виççĕмĕш вырăн хуçи.
14—17 çулхисем хушшинче Диана Карпова (Асанкасси) çĕнтерÿçĕ пулнă. Мальвина Петрова, Çĕнĕ Кипеç ялĕнче пурăнаканскер, иккĕмĕш вырăна тивĕçнĕ. Виççĕмĕш вырăнта – Александра Мамуткина (Комсомольски), Екатерина Школьникова (Асанкасси) тата Юлия Соколова (Аслă Çĕрпÿел).
«Дуэтсемпе ансамбльсем» категорире жюри членĕсем Диана Карповăпа Дарья Спиридонова чи пултаруллисем тесе палăртнă. «Вербочки» ансамбль — иккĕмĕш вырăн хуçи. Шел, çак каç сцена çине пĕр арçын ача та тухман.
«Кĕтне кĕввисем» конкурса пуçарса яракансенчен пĕри Елена Маштанова, 2001 çулхи çĕнтерÿçĕ Марина Волкова шăрантарнă юрăсем, ачасен искусство шкулĕнчи «Островок» ансамблĕн илемлĕ ташшисем фестивале илем кÿнĕ, куракансен кăмăлне çĕклентернĕ.
Источник: "Каçал Ен"