11 декабря 2010 г.
Хаçат-журналĕ темле илемлĕ, интереслĕ, пуян содержаниллĕ пулсан та, ăна çынсем хушшинче сараканни ăста çын кирлĕ. Периодика изданийĕсем хулара ытларах киосксем, магазинсем урлă саланаççĕ пулсан, ялта ку ĕçе почтальонсем хăйсем çине илнĕ. Шăпах вĕсен ĕçченлĕхĕнчен, çынсемпе пĕр чĕлхе тупма пĕлнинчен килет те пичет продукцийĕн шăпи.
София Скворцова почтальонра çирĕммĕш çул ĕçлет. Тукай ял çыннисене чун апачĕпе тивĕçтерес тесе тăрăшать вăл. Енчен те Çĕнĕ Мăратри почта çыхăну уйрăмĕ урлă кăçалхи иккĕмĕш çур çулта пурĕ 262 экземпляр «Каçал ен» илсе тăраççĕ тĕк, София Николаевна вĕсенчен 90-шне çырăнтарнă. 2011 çулхи пĕрремĕш çур çулта та район хаçачĕпе туслă пулас текенсем йышлă Тукай ялĕнче. Республикăра тухса тăракан ытти хаçатсене ял çыннисене вулаттарас тесе те тимлет вăл. Кунсăр пуçне пичет продукцийĕсене, куллен кирлĕ таварсем сутассине те аван йĕркелеме пултарнă. Çакă пĕтĕмпех хĕрарăм ĕçе чунтан юратса пурнăçланинчен, унăн тăрăшулăхĕнчен, ăшă кăмăлĕпе чунлăхĕнчен килет.
Çĕнĕ Мăратра, Вутланпа Тăманлă Выçлире те «Каçал ене» вуншар çул çырăнса илекенсем чылайăн. Декабрĕн 10-мĕшĕ тĕлне тăватă ялĕпе район хаçатне килес çул илсе тăма 230 экземпляр çырăнтарма ĕлкĕрнĕ. Галина Карзакова, Людмила Яковлева, Альбина Яковлева ял çыннисемпе кунсерен тĕл пулса вĕсене ырă кăмăл парнелеççĕ, çĕнĕ хыпарсем çитерсе параççĕ.
Источник: "Каçал Ен"