08 декабря 2010 г.
Магазина тĕрлĕ çын кĕрет: ваттисем те, çамрăксем те, ачасем те. Хăшĕ-пĕри куçĕсем курманнипе е урăх сăлтавпа, вăл е ку тавар хакĕ, пахалăхĕ пирки ыйтса сутуçăсен вăхăтне чылай чакаратчĕç. Халĕ район центрĕнче самообслуживани енĕпе ĕçлекен темиçе магазин та пур. Карçынкка йăт та сентресем хушшипе хăвна килĕшекен продукта шыраса ут.
— «Сельхозпродукты» магазин çак мелпе ĕçлеме пуçланăранпа тавар туянакансен йышĕ чылай ÿсрĕ. Пире те çăмăлрах,– тет Р.Х.Ялакова заведующи. Унпа пĕрле кунта Н.З.Сулейманова, Г.Н.Какулева ĕçлеççĕ.
Магазин ассортименчĕ пуян. Ăна çĕнетсех пыраççĕ. Кунсăр пуçне халăхăн хушма ыйтăвĕсене (заказĕсене) те тивĕçтереççĕ. Кама выльăх апачĕ, кама тата ытти апат-çимĕç кирлĕ, килнех çитерсе параççĕ.
Магазин заведующийĕ Рафие Халитовна суту-илÿ системинче 35 çул тăрăшать. Ĕçлеме вăл Урмаелĕнчи куллен кирлĕ таварсен магазинĕнче пуçланă. Кайран Комсомольскинчи суту-илÿ точкисенче тăрăшнă.
— Тавар сутăнать. Çакă пирĕншĕн — чи пахи. Акă планпа 510 пин тенкĕлĕх апат-çимĕç продукцийĕ сутмалла пулнă пулсан, эпир 630 пин тенкĕлĕх сутрăмăр,— каласа парать Р.Ялакова. Малашне те вĕсем халăха пахалăхлă продукципе савăнтарасса шанатпăр.
Источник: "Каçал Ен"