08 декабря 2010 г.
Районта тĕрлĕ сăлтава пула сусăрланнă çынсем сахал мар. Вĕсен пурнăçĕ хĕн. Çавăнпа та инвалидсем çине тимлĕх ытларах уйăрни кирлĕ. Çакна патшалăх та, районти яваплă çынсем те лайăх ăнланаççĕ, мĕн май килнĕ таран пулăшма тăрăшаççĕ. Районти тĕп библиотекăра Пĕтĕм тĕнчери инвалидсен кунне халалланă уява район администрацийĕн пуçлăхĕ Г.Ф.Волков, РФ Пенси фончĕн районти управленийĕн начальникĕн çумĕ И.Г.Белобаева, социаллă хÿтлĕх пайĕн начальникĕ И.А.Никитина хутшăнни, нумай ыйту çине хуравлани çакнах çирĕплетет. Инвалидсене районти тĕп больницăн представителĕпе В.А.Галкинпа, районти социаллă страховани фончĕн тĕп специалисчĕпе В.А.Тихоновăпа, «Чувашия Мед» страхлакан компанин районти уйрăмĕн ертÿçипе З.А. Галкинапа, медицинăпа эксперт комиссийĕн кăнтăр енчи руководителĕпе В.В.Васильевăпа калаçни, вĕсен сăмахĕсене итлени те усăллă пулчех.
Районти культурăпа кану центрĕ çумĕнчи «Каçал» фольклор ансамблĕн юррисене пуçтарăннисем хапăлласа йышăнчĕç. Вĕри те техĕмлĕ чейпе сăйланнă май калаçу малалла тăсăлчĕ. Пуплемелли, аса илмелли кашнинех тупăнчĕ. Яланах пĕр-пĕринпе тĕл пулаймаççĕ-çке вĕсем. Кун евĕр мероприятисем тăтăшрах ирттермелле.
Уяв каçне В.Г.Боровковăпа Л.Н.Морозова интереслĕ ертсе пычĕç.
Ача-пăча библиотекинче ĕçлекенсем çак кун инвалид-ачасене кĕтсе илчĕç. Вĕсемпе интереслĕ тĕрлĕ мероприятисем ирттерчĕç. Тупмалли юмахсен тупсăмĕсене, викторина ыйтăвĕсем çине хуравсем шырарĕç. Вăйăсем те пулчĕç. Спонсорсем ачасем валли парнесем те хатĕрленĕ. Çакă вĕсене хавхалану кÿчĕ.
Источник: "Каçал Ен"