04 декабря 2010 г.
Иртнĕ тунти кун РФ Пенси фончĕн районти управленийĕнче ачасем çуратнă амăшĕсене сертификатсем пачĕç. Хальхинче тăваттăн илме тивĕç пулчĕç çак документа: Марина Александровна Титова, Магсума Насертдиновна Мавлютова, Раиса
Михайловна Кузьмина тата Елена Олеговна Прохорова.
Титовсемпе Прохоровсем иккĕмĕш, Мавлютовсемпе Кузьминсем вара çемьери виççĕмĕш ачашăн сертификат илчĕç.
Чи малтанах ача амăшĕсене саламласа район пуçлăхĕ Евгений Иванович Карпеев сăмах тухса каларĕ. Вăл пепкесене сывă-тĕреклĕ ÿстерме амăшĕсене кăна мар, ашшĕсене те ырлăх-сывлăх сунчĕ. Малалла сăмах Пенси фончĕн районти уйрăмĕн начальникĕн тивĕçĕсене пурнăçлакан Ирина Германовна Белобаева илчĕ, пухăннисене ăнăçу сунчĕ.
Ача амăшĕсем ĕçленĕ вырăнсенчен те хăнасем килсе çитрĕç. Татьяна Сергеевна Тимергалеева, Людмила Кирилловна Кокшина, Светлана Геннадьевна Ульдина тата ыттисем те пĕрин хыççăн тепри тухса ăшă сăмахсем каларĕç, парнесем тата чечек çыххисем пачĕç.
Çавăн пекех районти социаллă хÿтлĕх пайĕн начальникĕ Ираида Алексеевна Никитина тата районти хĕрарăмсен совечĕн председателĕ Валентина
Николаевна Курицына Аннесен иртсе кайнă кунĕ ячĕпе пуçтарăннисене саламларĕç.
Ирина Анатольевна Гришинăпа Татьяна Николаевна Тарасова юрланă «Желаем счастья» юрă пурне те савăк кăмăл парнелерĕ.
Источник: "Каçал Ен"