27 ноября 2010 г.
Нумаях пулмасть районти культурăпа кану центрĕнче Шупашкарти коопераци институчĕн Уçă алăксен кунĕ иртнĕ. Ку мероприятие район админи-страцийĕн пуçлăхĕ Г.Ф.Волков, истори наукисен докторĕ, ЧР Патшалăх Канашĕн депутачĕ, Шупашкарти коопераци институчĕн ректорĕ В.В.Андреев, экономика наукин кандидачĕ Л.Н.Дмитриева проректор, педагогика наукисен докторĕ, профессор, йышăну комиссийĕн яваплă секретарĕ Н.С.Толстов хутшăннă. Залра ларакан вĕренекенсене вĕсем рекламăпа агитаци материалĕсене, календарьсене, институтăн визиткине, «Студенческий вестник» хаçата валеçсе панă. Çÿлерех асăннă институт — Раççейри паллă аслă шкулсенчен пĕри. Уйрăмах кунта экономика пĕлĕвне парассине çÿллĕ шайра йĕркеленине палăртнă. Унти 5 факультетра тата 17 кафедрăра 8 пин ытла студент вĕренет. Институтăн вĕрентÿпе пурлăх никĕсĕ пуян. Кунтан професси енчен тарăн пĕлÿ илнĕ специалистсем тухаççĕ. Профессорсемпе преподавательсенчен 70 проценчĕн ученăй степенĕсемпе званийĕсем пур.
Тĕп хуламăртан килнĕ хăнасем аслă шкула вĕренме кĕмелли йĕркесемпе тĕплĕн паллаштарнă. Институт студенчĕсем концерт кăтартнă.
Источник: "Каçал Ен"