24 ноября 2010 г.
Çак кунсенче Чăваш Республикин Патшалăх Канашĕн культура, вĕрентÿ, наука, национальноçсен тата çамрăксен политикин комитечĕ ЧР Вĕрентÿ министерствин «Чăваш Республикинчи вĕрентÿ институчĕ» ПВУ ĕçченĕсемпе пĕрле пирĕн районти муниципаллă вĕрентÿ учрежденийĕсене çитсе курнă. Чăваш Ен Патшалăх Канашĕн Председателĕн заместителĕ, комитет председателĕ В.П.Мидуков ертсе пыракан комисси Комсомольски 1-мĕш тата 2-мĕш, Урмаел вăтам шкулĕсене çитнĕ. Аслă Чурачăк, Тукай Мишер, Кĕçĕн Çĕрпÿел вăтам шкулĕсенчи педагогика коллективĕсен ĕçĕ-хĕлĕпе паллашнă. Çавăн пекех «Чăваш Республикинчи чĕлхесем çинчен» тата «Вĕрентÿ çинчен» ЧР саккунĕсене пурнăçлас тĕлĕшпе мĕнле ĕçленине тимленĕ. Комисси членĕсем тăван чĕлхе историйĕпе культурине вĕрентес опытпа та кăсăкланнă. Районти вăтам шкулсенче чăваш чĕлхипе литературине вĕрентесси епле шайра пулни те кăсăклантарнă вĕсене.
Источник: "Каçал Ен"