24 ноября 2010 г.
Урмаел каччи Динар Зейдуков ачаранах спорта кăмăлланă, сывлăхлă çитĕннĕ. Кăçал унăн çара кайма ят тухнă. Сывлăх тĕлĕшпе вăл Россия Президенчĕн полкĕнче службăра тăма тивĕç пулнă. Ноябрĕн 20-мĕшĕнче Динара ашшĕпе амăшĕ, район администрацийĕн пуçлăхĕ Г.Ф.Волков, ЧР çар ĕç комиссариачĕн Комсомольски тата Елчĕк районĕсенчи уйрăмĕн начальникĕ А.А.Маурин Канашри пункта чыслăн ăсатрĕç. Геннадий Федоровичпа Андрей Анатольевич пулас салтака Тăван çĕр-шыва лайăх сыхлама, Комсомольски районĕн чысне çÿлте тытма ыр сунчĕç.
Сăмах май çакна каласа хăварар: асăннă полка Чăваш Енрен кĕрхи призывпа пурĕ 15 яш тухса кайрĕ. Çак шутра пирĕн район представителĕ те пулни — чăннипех пысăк чыс.
Источник: "Каçал Ен"