20 ноября 2010 г.
Ноябрĕн 17-мĕшĕнче районта черетлĕ Пĕрлехи информаци кунĕ иртрĕ. Комсомольски районне Чăваш Республикин культура, национальноçсен ĕçĕсен, информаци политикин тата архив ĕçĕн министрĕ Р.М.Лизакова ертсе пыракан ушкăн килчĕ. Çак кун халăхпа тĕл пулса тăватă тĕп ыйту сÿтсе явма палăртнă: физкультурăпа спорт комплексĕсене усăллă ĕçлеттересси; 2010 çулхи 9 уйăхра налуксемпе сборсем мĕнле пуçтарăнни тата Чăваш Енри муниципалитетсен умĕнчи вырăнти бюджета налуксем кĕртессине лайăхлатассипе тумалли ĕçĕсем, халăхăн налук культурине ÿстересси, ЧР Президенчĕн ноябрĕн 3-мĕшĕнчи «Чăваш Республикин Обществăлла палати çинчен» Указне пурнăçа кĕртсе гражданла обществăна аталантарассин малашлăхĕ, вăрçă участникĕсене çурт-йĕрпе тивĕçтересси. Пирваях информаци ушкăнĕ район администрацийĕн пуçлăхĕн ĕçĕсене вăхăтлăх туса пыракан Б.М.Каринкинпа тĕл пулчĕ.
Роза Лизакова çав кун Элпуç ял поселенин ĕç-хĕлĕпе паллашрĕ. Пирваях Роза Михайловна «Дружба» ЯХПК председателĕпе Р.М.Мансуровпа, культура ĕçченĕсемпе тĕл пулчĕ, информаци кунĕнче палăртнă темăсемпе калаçрĕ. Ял поселени территорийĕнчи 5 ялта 1436 çын пурăнать. Кунта 3 культура учрежденийĕ. Шел пулин те, вĕсене паянхи кунччен газификацилемен. Элпуç культура çуртĕнче эпир çитнĕ чухне шăпах çут çанталăк газĕ кĕртме ăшă системине тăвас ĕçсем пыратчĕç. «Сельхозтехника» ПКФ рабочийĕсем вăй хураççĕ унта. Çивиттине вара маларах витнĕ. Шалта та юсав ĕçĕсем пурнăçлаççĕ. «Хăвăр тăрăшсан, министерство та пулăшма хатĕр сире. Реконструкци тата газификаци ĕçĕсене вĕçлесен модернизациллĕ культура çурчĕн статусне те пама пулĕ»,— терĕ министр.
Хирти Явăш тĕп шкулĕнче 119 ача пĕлÿ пухать, 5 ялтан çÿреççĕ. Вĕсенчен тăваттăшĕнне кăна нимле чир-чĕр те тупса палăртман. Çамрăк ăрăвăн сывлăхĕ çулран-çул япăхланни — аслисене чăннипех шутлаттаракан пулăм. Çавăнпа та физкультурăпа спорт комплексĕсене усăллă ĕçлеттерес ыйтăва шăпах вырăнлă хускатнă. Пирĕн районта çак объекта 2011 çулхи çу уйăхĕнче хута яма палăртаççĕ. Хăпартса лартнипе çеç мар, унта çынсем йышлăн çÿреччĕр, сывлăхне çирĕплетчĕр тесе чунне парса ĕçлекен кирлĕ кунта.
Чи аякри ялĕ шкултан 5 çухрăмра вырнаçнă. Шкул автобусĕ те пур ĕнтĕ, анчах, çулсем норматива тивĕçтерменнипе, унпа вĕренекенсене турттарма ирĕк памаççĕ. 2011 çулта районти çулсене йĕркене кĕртме бюджетран 31 миллион тенкĕ уйăрма палăртнă. Асăннă суммăн пĕр пайне шăпах çак çула тума ярасшăн.
ЧР конкурентлă политика тата тарифсен патшалăх службин ертÿçин çумĕпе Р. Лебедевăпа «Хлебозавод» ООО коллективĕн тĕл пулăвĕ интереслĕ, усăллă иртнĕ. Роза Петровна предприяти ĕçĕ-хĕлĕпе паллашнă, кунти ĕçченсен ыйтăвĕсем çине тулли хуравсем панă. Чылайăшне ялти специалистсене, çамрăк çемьесене пурăнмалли çурт-йĕрпе тивĕçтерес, çĕнĕ урамсене электричество кĕртес йĕрке кăсăклантарнă.
Источник: "Каçал Ен"