17 ноября 2010 г.
Хирти Шăхасан ялĕнче райпо магазинĕнче ĕçлекен Алена Алексеевăна çынсем лайăх пĕлеççĕ. Маттур та тăрăшуллă сутуçă пирки вĕсем ырăпа кăна калаççĕ. «Çынсемпе нихăçан та харкашни пулман ун. Магазин урати урлă каçнă çынна та шÿтлесе, кăмăлне çĕклесе ăсатса ярать. Кулленхи таварпа ти-вĕçтерме тăрăшать»,— теççĕ ун пирки ял-йышра.
А.В.Алексеева (хĕр чухнехи хушамачĕ — Герасимова) Патăрьелĕнче çуралса ÿснĕ. Мĕн пĕчĕкренех хĕр ача сутуçă пулма ĕмĕтленнĕ. Урамра та тантăшĕсене «сутуçăпа тавар туянакансем» вăййа выляма хистенĕ. Паллах, сутуçă вырăнĕнче — яланах пĕчĕк Алена. Ашшĕпе амăшĕ, Василий Дмитриевичпа Серафима Гордеевна, хĕрне яланах çынсемпе сăпайлă, тимлĕ пулма вĕрентнĕ. Герасимовсем тăватă ачине те ĕç пурнăçра чи хакли те чи хисепли пулнине тĕпе хурса пурăнма хăнăхтарнă.
Алена Васильевна икĕ хĕр ÿстерет. Светлана Чĕмпĕр хулинче фармаци колледжĕнче 3-мĕш курсра вĕренет, аптекăра ĕçлеме ĕмĕтленет. Виктория, 10-мĕш класс вĕренекенĕ, амăшĕпе юнашарах. «Ачасене те ĕçе юратма вĕрентетĕп. Эпĕ ĕçрен килнĕ çĕре хĕрĕм кил-çурта тирпейлет, апат пĕçерет, ĕне сăвать... Ман валли ĕçлеме нимĕн те хăвармасть»,— ăшшăн калаçрĕ сутуçă.
Сăмах май, вăл Комсомольски райпо тытăмĕнче 6 çул кăна ĕçлет пулин те, ял-йышра, коллективра чыс-хисепе тивĕçнĕ. Эпĕ наградăсем пирки ыйтсан, Алена Васильевна ăшшăн çапла хуравларĕ: «Маншăн вăл чи хакли — тавар туянакансем хисеплени. Ĕç кунĕ пуçличчен кашни тавар туянакан кăмăллă пултăр тесе тĕллев лар татăп. Тĕллевне вара пурнăçлама Турă чăтăмлăх кăна патăрччĕ»,— терĕ мана ăсатса А.Алексеева. Çапла пултăрччĕ те...
Источник: "Каçал Ен"