13 ноября 2010 г.
Ноябрĕн 10-мĕшĕнче милици службине туса хунăранпа 93 çул çитнине районта анлăн уявларĕç. Кăçалхи мероприятие нумай çул ĕçлесе тивĕçлĕ канăва тухнă ветерансем, милици сотрудникĕсем, вĕсен çемйисем хутшăнчĕç.
Йĕрке хуралçисен ĕçĕ ансат та çăмăл тесе калаймăн. Хуть ăçта, мĕнле пăтăрмах сиксе тухсан та вĕсен вăхăтра çитмелле. Çын пурлăхне çаратнă-и, кÿршĕ-аршă пĕр-пĕринпе харкашса вăрçăннă-и, такама хĕненĕ-и... Кунне-çĕрне пĕл-месĕр, канмалли кунсемсĕр тăрăшаççĕ пакунлă çынсем.
Савăнăçлă мероприятие районти шалти ĕçсен пайĕн начальникĕн ĕçĕсене тăваканĕ А.В.Левый уçрĕ, анлă доклад туса пачĕ. Ун хыççăн вара сцена çине район пуçлăхĕ Е.И.Карпеев тухрĕ. Вăл шалти ĕçсен органĕсен ветеранĕсене, паянхи кун саккун хуралĕнче тăракансене уяв ячĕпе чĕререн саламларĕ, ырлăх-сывлăх сунчĕ. Евгений Иванович пултаруллă ĕçченсене, А.Г.Ефремов, И.В.Козлов, И.М.Сиразетдинов милици капитанĕсене, И.Н.Аполонова аслă лейтенанта, ГИБДД уйрăмĕн инспекторне А.В.Куракова Хисеп грамотисем пачĕ.
Ун хыççăн Анатолий Васильевич Раççей Федерацийĕн наградисемпе — 2-мĕш степеньлĕ «За отличие в службе» медальсемпе В.В.Быков майора, С.Г. Абржин аслă лейтенанта, Н.Г.Гибатдиновпа А.Н.Албутов прапорщиксене, В.А.Васильев лейтенанта чысларĕ. 3-мĕш степеньлĕ «За отличие в службе» медальсене Р.Р.Алиуллов милици майорĕ, юстици тата милици капитанĕсем А.В.Свининпа И.А.Токмакова, А.В.Кураков лейтенант тата Г.А.Хуснутдинова прапорщик тивĕçрĕç.
Районти шалти ĕçсен пайĕн кадрсемпе ĕçлекен уйрăмĕн начальникĕ М.В.Фролов Геннадий Николаевич Кокшин милици подполковникĕ Раççей Президенчĕн Указĕпе килĕшÿллĕн «За отличие в охране общественного порядка» медаль илме тивĕçлĕ пулнине вуласа пачĕ. Ун хыççăн вара вăл районти шалти ĕçсен пайĕн начальникĕ алă пуснă приказпа та паллаштарчĕ. Унта маттур та пултаруллă сотрудниксене, Н.В.Индюкова аслă лейтенанта, М.В.Иванов лейтенанта, А.А.Соловьев прапорщика, А.Г. Павлов сержанта, В.М.Лапшин аслă сержантпа Д.Л.Михайлов сержанта Хисеп грамотисем панине, А.Р.Якушев аслă лейтенантпа С.Г.Абржин лейтенанта Тав сăмахĕ каланине çирĕплетрĕ.
Малалла районти милици ветеранĕсен совечĕн председателĕ П.В.Лапшин сăмах тухса каларĕ. Вăл нумай çул саккун хуралĕнче тăнă çынсене уяв ячĕпе ăшшăн саламларĕ, паянхи сотрудниксене чыса упрама, çÿлти шайра тытма сĕнчĕ. Ун хыççăн Петр Васильевич милици ветеранĕсене, Кира Ивановна Еремеевăпа Мария Алексеевна Илларионовăна «Чăваш Ен Шалти ĕçсен министерствине — 90 çул» юбилей медалĕсем парса чысларĕ. Çавăн пек медале районти пенсионерсемпе ветерансенчен 30 çынна яхăн илме тивĕç пулчĕç. Вĕсем: Петр Васильевич Лапшин, Николай Михайлович Иванов, Валерий Тимофеевич Павлов, Василий Сергеевич Чубуков, Вагиз Гаязович Ямалиев, Владимир Анатольевич Райков тата ыттисем те.
Уяв каçне малалла милици ĕçченĕсем хатĕрленĕ концерт тăсрĕ. Ăна Р.Н.Жукова аслă лейтенант йĕркелесе ертсе пычĕ. К.Алексеева, Д.Лялькин, И.Сиразетдинов шăрантарнă юрăсем куракансен чĕрисене тыткăнларĕç. Концерта районти ача-пăча искусство, Аслă Чурачăк вăтам шкулĕсенче вĕренекенсем те илем кÿчĕç.
Источник: "Каçал Ен"