10 ноября 2010 г.
Кашни çулах, 1999 çултан пуçласа, октябрь уйăхĕн тăваттăмĕш тунти кунĕнче Пĕтĕм тĕнчери шкул библиотекисен кунне паллă тăваççĕ. Çак уява халалласа республикăра шкул библиотекисен уйăхлăхне ирттерме палăртнă.
Пирĕн шкул ачисем те уйăхлăха хаваспах йышăнчĕç, тĕрлĕ вăйăсемпе конкурссем, викторинăсем ирттертĕмĕр. Палăртнă кун 4-мĕш «б» класс ачисем библиотекăна пухăнчĕç. Вĕсем кунта кĕнекесенчи геройсемпе тĕл пулчĕç, икĕ ушкăна пайланса тĕрлĕ ыйтусем çине хуравларĕç, вăйăсем вылярĕç. Уйрăмах Саша Чернова, Диана Санатуллина, Катя Лукиянова, Дима Мурзаев тата Ранис Акшев пултарулăхпа палăрчĕç. Вĕсем конкурссенче маттур пулни чăнах та нумай вуланине çирĕплетет.
Уявра иккĕмĕшпе виççĕмĕш классенче вĕренекенсем те пулчĕç. Вĕсен хушшинче те пултаруллисем пур: Кирилл Краснов, Галя Саванина, Света Гаврилова, Алсу Сафиуллина, Юля Соловьева, Лев Пушкин, Айгюль Минетуллина. Çĕнтерÿçĕсене грамотăсем парса чысларăмăр.
Уйăхлăх вăхăтĕнче «Пурăн, кĕнеке!» тата «Библиотекăна —парне» акцисем ирттерме палăртнăччĕ. 4-мĕш «а» класс ачисем кĕнекесене «сыватма» пулăшрĕç. Вĕсем тăрăшнипе чылай кĕнекене тирпее кĕртрĕмĕр. Пурте маттур ĕçлерĕç. Саша Чернова, Алсу Сафиуллина, Лев Пушкин, Айгюль Минетуллина, Данил Николаев тата Юля Соловьева библиотекăна кĕнекесем те парнелерĕç.
Уйăхлăх малалла пырать. Ачасене грамотăсем, хаклă парнесем те кĕтеççĕ.
Источник: "Каçал Ен"