03 ноября 2010 г.
Кĕрхи ĕçсене вĕçленĕ, çу тăршшĕпе мĕн çитĕнтернине пухса илнĕ хыççăн районта Ял хуçалăх ĕçченĕсен тата тирпейлекен промышленноçра тăрăшакансен уявне йĕркелесси йăлана кĕнĕ ĕнтĕ. Акă октябрĕн 29-мĕшĕнче районти культурăпа кану центрне хуçалăхсен ертÿçисемпе специалисчĕсем, лайăх кăтартупа палăрнă ĕçченсем, ял поселенийĕсен пуçлăхĕсем, хăнасем пуçтарăнчĕç.
Уява район пуçлăхĕ Е.И.Карпеев уçрĕ. Ун хыççăн райадминистрацин ял хуçалăх пайĕн начальникĕ Г.М.Киргизов анлă доклад туса пачĕ.
Кăçалхи çул çĕр ĕçченĕсемшĕн çăмăлах пулман. Типĕ çанталăк уй-хир культурисем çине витĕм кÿнĕ. «Йывăр çанталăка пăхмасăр акнă лаптăксенчен 12490 тонна пĕрчĕллĕ тата пăрçа йышши культурăсем, 14 пин тонна çĕр улми туса илнĕ. Хуçалăхсенче 3850 тонна утă, 16200 тонна сенаж, 1100 тонна силос, 3500 тонна улăм хатĕрленĕ»,— паллаштарчĕ цифрăсемпе пухăннисене Георгий Михайлович.
Районти колхозсенче, ял хуçалăх производство кооперативĕсенче тата ытти предприятисенче условнăй выльăх пуçне хĕл каçма 18,9 центнер апат единици хатĕрленĕ, нормăпа 27 пулмалла. «Урожай» колхозра ку кăтарту 31-пе танлашать, «Дружба», «Труд» ЯХПКсенче — 30, «Рассвет» ял хуçалăх производство кооперативĕнче — 27,5. Уй-хир бригадисенчен чи лайăххисене те палăртрĕ вăл. Пĕрремĕш вырăна тата «Ылтăн пучах» пĕчĕк приза «Восток» хуçалăхри Николай Андреев (23,1 центнер апат единици) ертсе пыракан бригада тивĕçнĕ. Иккĕмĕшпе виççĕмĕш вырăнсене «Урожай» колхозри Гельзефира Галиулловăпа (22,5 центнер апат единици) Светлана Улжусева (16,2 центнер апат единици) бригадисем тухнă.
Кăçал хуçалăхсенче 929 тонна аш-какай туса илнĕ. Çак енĕпе «Рассвет», «Восток», «Искра», «Слава», «Луч» ЯХПКсем, «Урожай» колхоз тухăçлăрах ĕçленĕ. Тĕслĕхрен, Алексей Ишмуратов («Искра») пăхакан выльăх-чĕрлĕх талăкра вăтамран 994-шер грамм ÿт хушнă. «Урожай» колхозри Галина Никифоровăпа Антонина Мунтайкина пăхакан 105 пуç мăйракаллă шултра выльăх талăкра вăтамран 825-шер грамм ÿт хушнă. Елена Крылова («Рассвет») та çак ĕçре пултарулăхпа палăрнă. Вăл пăхакан пăрусем талăкра вăтамран 856-шар грамм ÿт хушнă.
Ĕне сăвакансене те ырăпа аса илчĕ ял хуçалăх пайĕн начальникĕ. Кăçал 9 уйăхра районта пĕр ĕне пуçне вăтамран 3862 килограмм сĕт сунă. Ку вăл, пĕлтĕрхипе танлаштарсан, 160 килограмм ытларах. Уйрăмах ку енĕпе «Рассвет» (4935 кг), «Пайгас» (4830 кг), «Восток» (4440 кг) хуçалăхсен дояркисем хастар. Тĕслĕхрен, «Рассвет» ЯХПКра ĕçлекен Роза Алексеевăпа Ольга Наумова кашни ĕнерен вăтамран 5014-шар тата 4841-шер килограмм сĕт сунă. Людмила Чижикован («Асаново») кăтартăвĕ вара — 4819 килограмм.
Георгий Михайлович маттур та пултаруллă механизаторсене те палăртрĕ. Вĕсем — Василипе Евгений Долговсем («Дружба»), Владимир Тарасов («Урожай»), Минрамил Алимов («Труд»), Валерий Сумзин («Çĕр улмие мухтав» агрофирма), Сергей Хлебников («Восток»), Михаил Муллин («Рассвет»), Владимир Кудряшов («Искра»), Виталий Воробьев (Минатуллинăн фермер хуçалăхĕ), Виталий Кокарев («Комсомольскагропромхими»).
Чăваш Республикин культура, национальноçсен ĕçĕсен, информаци политикин, архив ĕçĕн министрĕн çумĕ В.А.Фошин та уяв ячĕпе пухăннисене саламларĕ. Вăл «Раççей Федерацийĕн тава тивĕçлĕ механизаторĕ» ята илнĕ «Победа» ЯХПК трактористне Николай Шагарова саламларĕ. Тĕп хуламăртан килнĕ хăна Раççей Федерацийĕн Ял хуçалăх министерствин Хисеп грамотисене те парса чысларĕ. Вĕсене Г.М.Долгов («Энергосервис» ООО), В.И.Фадеев («Пайгас»), Г.В.Атласкин (фермер хуçалăхĕ), В.А.Коновалов («Восток»), Г.В.Кузьмин («Труд»), Н.И.Романова (райадминистраци), З.М.Григорьева («Россельхозбанк» УАО), З.Г.Максимова ветеринари врачĕ илме тивĕç пулчĕç.
Малалла Чăваш Патшалăх Канашĕн депутачĕ, «Чувашрегионгаз» генеральнăй директорĕ К.С.Мифтахутдинов, Г.Ф.Волков сăмах тухса каларĕç, ырлăх-сывлăх сунчĕç.
Пысăк «Ылтăн пучах» приза кăçал «Урожай» колхоз илме тивĕç пулчĕ. Иккĕмĕшпе виççĕмĕш вырăнсене «Восток» тата «Пайгас» хуçалăхсем тухрĕç, вĕсене Дипломсем парса чысларĕç.
Тĕп хуламăртан килсе çитнĕ хăнасем «Урожай», «Пайгас», «Восток», «Слава», «Труд», «Дубрава», «Рассвет», «Дружба», «Луч» хуçалăхсен председателĕсене А.Н.Ершова, В.И. Фадеева, В.Г.Михеева, В.П.Николаева, М.М.Шарафутдинова, М.Р.Афанасьева, Р.М.Мансурова, Н.М.Иванова Тав çырăвĕсемпе, хаклă парнесемпе чысларĕç. Райадминистрацин ял хуçалăх пайĕн начальникĕ Г.М.Киргизов та «Белпромсервис» УАОн асăнмалăх парнине тивĕçрĕ.
«Чувашия-Поддержка» страхлакан организаци те уява пушă алăпа килмен. Унăн представителĕ А.М.Зейнетдинова тачă çыхăну тытса ĕçлекен хуçалăхсен — «Урожай» тата «Рассвет» — ертÿçисене А.Н.Ершовпа М.Р.Афанасьева премисем пачĕ.
Ун хыççăн сцена çине районти культурăпа кану центрĕнчи художество пултарулăх ушкăнĕсем тухса юрă-кĕвĕпе савăк кăмăл парнелерĕç.
Источник: "Каçал Ен"