27 октября 2010 г.
«Çĕнĕ, пысăкрах çитĕнÿсемшĕн» (1986 çул, февралĕн 13-мĕшĕ) статьяра района черетлĕ пысăк награда пани çинчен пĕлтернĕ. 1985 çулта Пĕтĕм Российăра социализмла ăмăртура çĕнтернĕшĕн Комсомольски районĕ РСФСР Министрсен Совечĕпе ВЦСПСăн куçса çÿрекен Хĕрлĕ ялавне тивĕçнĕ. Ун чухне КПСС Комсомольски райкомĕн пĕрремĕш секретарĕнче П.И.Мужиков, халăх депутачĕсен район Совет ĕçтăвкомĕн председателĕнче А.Ф.Шипатов тăрăшнă.
1986 çулхи февралĕн 25-мĕшĕнче Мускавра КПСС XXIII съезчĕ ĕçлеме пуçланă. «Съезда — ĕç парнисемпе!» рубрикăра ĕç коллективĕсем партин тĕп форумне мĕнле çитĕнÿсемпе кĕтсе илнине каласа панă.
Ас тăватăр-и, Совет Союзĕ уçлăха космос карапĕ вĕçтермессерен «сенкер экран» умне пухăнаттăмăр. Çак событи пуриншĕн те питĕ пысăк пĕлтерĕшлĕ пулнă, вунă ачаран çуррийĕ космонавт пулма ĕмĕтленнех. Акă «Октябрь ялавĕ» мартăн 13-мĕшĕнче «Союз-Т» карап вĕçтерсе янине хыпарланă. Экипаж çак çынсенчен тăнă: карап командирĕ Леонид Денисович Кизим тата борт-инженер Владимир Алексеевич Соловьев, иккĕшĕ те — Совет Союзĕн Геройĕсем (1986 çулхи мартăн 15-мĕшĕ). Çак номертех «Вĕсем — районта чи лайăххисем» статьяра 1985 çулхи ĕç итогĕсем тăрăх мала тухнă çынсен сăн ÿкерчĕкĕсем пичетленнĕ. «Профессипе чи лайăххи» ята çав çулхине «Восток» колхозри хурт-хăмăр ăсти Н.Катмаков, Тукайри культура çурчĕн директорĕ В.Печникова, Аслă Çĕрпÿелĕнчи библиотека заведующийĕ Г.Любимова, «Дружба» колхозри Р.Ильязов водитель тивĕçнĕ. Çавăн пекех М.Иванова пекарь, «Заветы Ильича» колхозри А.Шуряшкина техник-осеменатор, «Россия» хуçалăхăн конюхĕ В.Шалин, Н.Деменкова доярка («Россия» колхоз), П.Векова сысна самăртакан («Россия»), Хырай Ĕнелĕнчи В.Зайцева почтальонка, В.Гаврилов электромонтер (11-мĕш ЛТЦ) лайăххисен шутĕнче пулнă. Хырай Ĕнел вăтам шкулĕн учительне Л.Макаровăна «Районти пропагандистсенчен чи лайăххи» тесе палăртнă.
«Ферма ĕçченĕн страници» кăларăм тухма пикеннĕ. Унта выльăх-чĕрлĕх отраслĕнче тăрăшакансем — ферма заведующийĕсем, зоотехниксем, дояркăсемпе пăру, сысна пăхакансем хăйсен опычĕпе паллаштарнă, тĕрлĕ ыйту сÿтсе явнă.
Районсем вăл вăхăтра выльăх-чĕрлĕх продукчĕсем туса илессине ÿстерессипе, вĕсене патшалăха ытларах сутассипе плансемпе социализмла обязательствăсем йышăннă. 1986 çулхи пĕрремĕш квартал пĕтĕмлетĕвĕсемпе çавсене ăнăçлă пурнăçланăшăн Комсомольски районĕ КПСС обкомĕн, Чăваш АССР Министрсен Совечĕн, облпрофсоветăн тата ВЛКСМ обкомĕн куçса çÿрекен Хĕрлĕ ялавне тата «Ĕçри хастарлăхшăн» дипломне тивĕçнĕ. Çакăн çинчен 1986 çулхи майăн 15-мĕшĕнче тухнă номерте пĕлтернĕ.
Районти хуçалăхсем те ÿсен-тăран отраслĕнче ÿсĕмлĕ ĕçленĕ. «Алга», «Знамя», «Красный Октябрь», «Дружба» колхозсене Пĕтĕм Российăри социализмла ăмăртура çĕнтер-нĕшĕн РСФСР Министрсен Совечĕпе ВЦСПСăн куçса çÿрекен Хĕрлĕ ялавĕсене панă. Çак хуçалăхсен ĕçченĕсем социализмла ăмăртура çĕнтернĕшĕн панă преми укçине (2-шер пин тенкĕ) Чернобыльти атом электростанцийĕнчи аварире инкек тÿснисене ярса пама пĕр кăмăллă пулса йышăннă (1986 çул, майăн 27-мĕшĕ). Çавăн пекех промышленноç предприятийĕсем хушшинчи ăмăртура сăра тата тутлă шывсем туса кăларакан завод коллективĕ час-часах çĕнтерÿçĕ пулнă.
«Пултаруллă дояр» тĕрленчĕкре В.Григорьев «Алга» колхозри Гареф Хамбиков ĕне сăвакан çинчен каласа панă (1986 çул, июлĕн 5-мĕшĕ). Ун чухне те, халь те арçынсем хушшинче çак профессие суйлакансем сахалрах.
Пирĕн районта паянхи куна ял хуçалăхĕпе ĕçлекен вăтăра яхăн предприяти шутланать. Ун чухне вара шăп 12 пулнă: «Алга», «Восток», «Гигант», «Заветы Ильича», «Заря», «Знамя», «Дружба», «Комсомольский», «Красный Октябрь», «Луч», «Россия» тата «Урожай». Хуçалăхсем пĕр-пĕринпе сĕт, аш-какай, çăм туса илессипе ăмăртнă, çав кăтартусене пĕрмаях «Октябрь ялавĕнче» пичетленĕ.
«Атлантовецсем хастар» статьяра Чăваш педагогика институтĕнчи студентсен «Атлант» строительство отрячĕ района килнĕ пирки çырнă (1986 çул, августăн 21-мĕшĕ). «Отряд «Заря» колхозра автомашинăсем тăратмалли площадкăна бетон сарнă çĕрте вăй хурать. Кунсăр пуçне Çĕнĕ Мăратри асăну палăкне юсанă, шкул тăррине сăрланă. Ялти ватăсене вут касса, çурса параççĕ, кил-çурт таврашне тирпейлеççĕ. Час-часах халăх умĕнче концертсем кăтартаççĕ»,— тенĕ статья авторĕ Н.Зайцева. Сăмах май çакна каласа хăварам: «Атлант» отряд командирĕ Хасият Идиатуллин ( халĕ «Слава картофелю» агрофирмăра тăрăшать) пулнă.
Çĕр ĕçченне, çăкăр тăвакана чăваш авалтанах хисепленĕ. Пирĕн районта та çаплах пулса пынă ку. Ĕçре малта пыракансене, чи тивĕçлисене патшалăх наградисемпе чысланă. Октябрĕн 30-мĕшĕнчи номерте «Россия» колхозри П.И.Ярлыгин тракториста вун пĕрмĕш пилĕк çуллăх заданийĕсемпе социализмла обязательствăсене пурнăçлас ĕçре пысăк çитĕнÿсем тунăшăн Ĕçлĕх Хĕрлĕ Ялав орденĕпе наградăлани çинчен çырнă.
Источник: "Каçал Ен"