27 октября 2010 г.
Комсомольскинче пурăнакан Зоя Ивановна Седован ашшĕне, Иван Яковлевич Нюкина, 1941 çулхи утă уйăхĕнче фронта илсе кайнă.
Нюкин лейтенант артиллерист пулнă, вăрçăн пирвайхи кунĕсенчех паттăрлăх кăтартнă. Унăн батарейи Калуга облаçĕнчи ял-хуласене тăшманран ирĕке кăларассишĕн хастар çапăçнă. 1942 çулхи пуш уйăхĕнче пĕр çапăçура пехотăн чакма тивсен те, артиллеристсем çав позицирех юлса мĕн каçчен тăшмана наступлени тума чарса тăнă. Наводчик стройран тухсан лейтенант хăй ун вырăнне йышăнса тăшман çине вут-çулăм тăкнă. Каç пулсан тин вăл командовани приказне пурнăçласа позицие улăштарнă. Хăюлăх кăтартнăшăн Иван Нюкина «Паттăрлăхшăн» медальпе наградăланă. Анчах та вăл тивĕçлĕ медале алла илеймен — тепĕр хаяр çапăçура вилмеллех аманнă.
Иртнĕ кунсенче Нюкин лейтенанта «Паттăрлăхшăн» медальпе наградăлани çинчен Д.Медведев Президент алă пуснă удостоверение медаль хуçийĕн хĕрне асăнса пурăнма, çемьере упрама çар ĕç комиссариачĕ çитерсе панă.
Сăмах май каласан, Зоя Ивановна ашшĕн шăпине нумай вăхăт пĕлмесĕр пурăннă. Архивсем урлă шыраса тупнă хыççăн вăл ашшĕн вил тăпри çине, Калуга облаçне, кайса килнĕ. Ăна вырăнти влаç çыннисем тата шкул ачисем ăшшăн йышăннă. Вил тăпри çине лартнă постамент çинче ашшĕн ятне курсан, чунĕ хурланнипе куççулĕ тухнă.
З.Седова ветерансен «Надежда» клубĕнче Ваттисен кунне ирттернĕ чух ашшĕ çинчен аса илнисемпе тата награда удостоверенийĕпе паллаштарчĕ.
Паттăрсен ят-сумĕ вилĕмсĕр. Çĕнтерÿçĕсем хальхи çамрăксемшĕн яланах ырă тĕслĕх пулччăр, патриотизм туйăмне вăйлатчăр.
Источник: "Каçал Ен"