23 октября 2010 г.
Нумаях пулмасть районти культурăпа кану центрĕ çумĕнчи «Каçал» халăх фольклор ансамблĕ Калуга хулине çитсе курнă. Унта вăл «Çăлкуçсем» («Истоки») фестивале хутшăнса хăйĕн пултарулăхне кăтартнă, III степеньлĕ Диплом çĕнсе илнĕ.
Фестивале хутшăнакансем октябрĕн 15—17-мĕшĕсенче турбинăсем туса кăларакан заводăн Культура керменĕн сцени çинче халăх кĕвви-юррине янăратнă. Артистсем çĕр-шывăн тĕрлĕ кĕтесĕсенчен — Тула, Воронеж, Владимир, Саратов, Липецк, Смоленск, Калуга, Брянск, Чулхула облаçĕсенчен, Орел, Астрахань, Мускав, Курск, Тверь хулисенчен те пулнă.
Конкурсра комсомольскисем «Шăнкăр-шăнкăр шыв юхать», «Ешĕл йăмра сасси», «Сакăл тур лаша» юррисемпе тата «Асанне ташши», «Гармониста калăр-ха» ташăсемпе куракансене савăнтарнă. «Каçал» халăх фольклор ансамблĕн репертуарĕ анлă та пуяннине фестивалĕн жюри председателĕ, П.И. Чайковский ячĕллĕ Мускав патшалăх консерваторийĕн профессорĕ Н.Н.Гилярова та палăртнă.
— Конкурса Раççейри 16 регионтан 23 коллектив хутшăнчĕ,— пĕлтерчĕ В.Павлов, ансамбль руководителĕ. — Хамăрăн ăсталăха сцена çинче октябрĕн 16-мĕшĕнче кăтартрăмăр. 18-мĕшĕнче вара гала-концерт пулчĕ. Чи асамлă самант вăл, паллах, Калуга облаçĕн губернаторĕн А.Д.Артамоновăн аллинчен «Самсунг» телевизор — фестивалĕн тĕп призне — илни.
Калаçăва малалла ансамбль солисчĕ В.Н.Гаврилов тăсрĕ. «Хула администрацийĕ фестивале тĕплĕ хатĕрленни куç кĕретех. Пире, хăнасене, мультимедийлă презентацисем, тĕрлĕ выставка-ярмăрккасем, мастер-классем кăтартрĕç. Артист пурнăçĕ çапла: таçта та çитме, курма тÿр килет. Калуга çĕрĕ çинче фестивале ирттерме яваплă çынсем чăннипех те «çанă тавăрса» хатĕрленнĕ»,— терĕ Валерий Николаевич, фестивальти сăн ÿкерчĕксемпе паллаштарса.
Владимир Павлович çак фестивале кайса килме спонсорла пулăшу панă çынсене те аса илчĕ. «Коллектив ячĕпе Хасият Семигуллович Идиатуллинпа («Çĕр улмие мухтав» агрофирма ертÿçи) Евгения Анатольевна Карпеевăна («Кооператор» ООО) тав сăмахĕ калатăп»,— терĕ ансамбль руководителĕ.
Çитĕнÿсем çинче чарăнса тăмаççĕ «Каçал» фольклор ансамблĕн артисчĕсем. Вĕсем 2011 çулта июнь уйăхĕнче Тула облаçĕнче иртекен «12 ключей» фестиваль-конкурса хатĕрленме пуçланă.
Источник: "Каçал Ен"