23 октября 2010 г.
Район администрацийĕн ял хуçалăх пайĕ икĕ эрнелĕх курссем йĕркеленĕ. Унта «Восток», «Искра», «Луч», Рассвет», «Слава» тата «Труд» хуçалăхсенчи 25 доярка çÿреме кăмăл тунă. «Нива» вĕренÿ центрĕн специалисчĕсем килсе вĕсем валли лекцисем вулаççĕ. Ĕне сума мĕн пĕлмелли пур вара текен те пур пуль. Пĕлмелле çав, темĕн те. Выльăхăн физиологийĕпе анатомийĕнчен, сумалли аппарат тытăмĕнчен пуçласа ĕç хăрушсăрлăхĕ, харпăр хăй гигиени таранах.
«Маларахри вăхăтра çакăн пек курссене кашни 5 çулта йĕркелекенччĕ. Халĕ çав ырă йăлана чĕртсе тăратма шутларăмăр. Кăçал бюджетран укçа-тенкĕ уйăрнипе вĕренĕве йĕркелеме май килчĕ. Дояркăсем октябрĕн 19—30-мĕшĕсенче ĕçре кирлĕ пулакан тĕп пĕлĕве алла илĕç. Ноябрĕн 1-мĕшĕнче вара вĕсен мĕн вĕреннине экзамен тытса çирĕплетес пулать», — терĕ ял хуçалăх пайĕн тĕп зоотехникĕ К.Г.Гимальтдинов.
Источник: "Каçал Ен"