29 сентября 2010 г.
Пирĕн çут çанталăк мĕн тери илемлĕ, пуян. Улма-çырлине, сиплĕ йывăç-курăкне парнелет вăл пире. Вĕтĕ хурт-кăпшанка асăрхамастпăр та. Тумтир е кĕлетке çине пырса ларнă лĕпĕше лапчăтса вĕлеретпĕр е хăваласа яма тăрăшатпăр. Вĕсен хăйсен пурнăçĕ, çут çанталăкри вырăнĕ пирки пĕрре те шутламастпăр. Вĕсем те пирĕн пурнăçра пысăк пĕлтерĕшлĕ-çке. Тăван тавралăхра вĕçекен лĕпĕшсене тата хурт-кăпшанка курма, вĕсем пирки тĕплĕнрех пĕлме районти «Çĕр тата çынсем» музейре ĕçлекен «Жуки и бабочки мира» выставка пулăшĕ. Хамăр республикăри Çĕрпÿ районĕнче çуралса ÿснĕ Виссарион Петрович Лосманов, мĕн пĕчĕкренех хурт-кăпшанкăсемпе интересленекенскер, вĕсен пуян коллекцине пуçтарнă. Унта Чăваш Енрисем çеç мар, ытти çĕр-шывсенчи хăйне евĕрлĕ, пирĕн патра çук хурт-кăпшанкă та пур. Килсе курмасăр вĕсем пирки пĕлеймĕр.
Виссарион Петрович çак енĕпе хавхаланнăскер Вăтам Азине те, Урал тăрăхне те, тата ытти вырăнсене те çитсе курнă. Çулсеренех Чăваш Енти экспедицисене хутшăнать. Ун пирки нумай-нумай çырма пулать. Çут çанталăк, тăван тавралăх, экологи ыйтăвĕсемпе тĕрлĕ çынсемпе калаçу йĕркелет.
Районти «Çĕр тата çынсем» музейра сентябрĕн 10-мĕшĕнче унăн выставки уçăлчĕ. Вăл ноябрь уйăхĕчченех ĕçлет. Куравра 3 пин ытла лĕпĕше, 1500 хурт-кăпшанка курма май пур. Пиртен нумайăшĕ Агриппина, Атлас, Голубая молния ятлă пысăк лĕпĕшсене, Голиаф, Геркулес, Носорог нăрăсене пĕлмеççĕ те пулĕ. Килĕр, курăр! Çакă сирĕн тавракурăма ÿстерме пултарĕ. Çавăн пекех ятарлă рамăсенче вырнаçтарнă лĕпĕшсене сутăн илме пултаратăр.
Источник: "Каçал Ен"