29 сентября 2010 г.
Сентябрĕн 26-мĕшĕнче Комсомольски вăрманĕ хĕрринче Пĕтĕм Раççейри «Нацисен кросĕ — 2010» ăмăрту иртрĕ. Ăна ял поселенийĕнче ĕçлекенсем йĕркелерĕç. Кăçал вăл кашни ял тăрăхĕнче иртрĕ.
Районта физкультурăпа спорт енĕпе ĕçлекен специалистсем çамрăксемпе шкул ачисене, аслăрах çулхисене сывă пурнăç йĕркине хăнăхтарассишĕн сахал мар ĕç тăваççĕ. Çак ăмăртăва та вĕсемех — Е.Тихонов, А.Пундяков, С.Остапиенко — йĕркелесе ертсе пычĕç.
Спортпа физкультурăна юратакансене саламлама Чăваш Республикин культура, национальноçсен ĕçĕсен, информаци политикин, архив ĕçĕн министрĕ Р.М.Лизакова, район пуçлăхĕ Г.Ф.Волков килсе çитрĕç, пурне те ăнăçу сунчĕç.
Раççейри «Нацисен кросĕ —2010» хăйне евĕрлĕ пысăк уяв пек иртрĕ.
Чи малтан VIP—чупу пулчĕ. Çак хĕрÿ тупăшура арçынсенчен Е.А.Тихонов пĕрремĕш, Ю.В.Скворцов иккĕмĕш, В.И.Пундяков виççĕмĕш вырăнсене тухрĕç. Хĕрарăмсем 500 метрлă дистанцире вăй виçрĕç. Чи малтан финиша М.Илларионова чупса çитрĕ. Иккĕмĕшпе виççĕмĕш вырăнсене Комсомольски 2-мĕш вăтам шкулĕнче тăрăшакансем Н.Н.Салминапа В.Г.Краснова йышăнчĕç.
Ун хыççăн старта çамрăкрах спортсменсем тăчĕç. Хĕрарăмсенчен пултаруллисем — Комсомольски 2-мĕш вăтам шкулĕнче ĕçлекенсем В.Г.Красновăпа С.Г.Индюкова. Арçынсенчен В.Мурзаев, В.Гордеев тата А.Абросимов пулчĕç, пĕрремĕш-виççĕмĕш вырăнсене тухрĕç.
Шкул ачисем хушшинче те ăмăрту хĕрÿ иртрĕ. Хĕр ачасенчен Аня Афанасьева, Олеся Тихонова, Анастасия Матвеева, арçын ачасенчен Дмитрий Малышев, Тимур тата Артем Филипповсем пултарулăхпа палăрчĕç, малти вырăнсене йышăнчĕç.
Кроса хутшăнса çĕнтернисене Комсомольски ял поселенийĕн администрацийĕ Хисеп грамотисемпе тата парнесемпе хавхалантарчĕ.
Районĕпе çак кун 850-ăн чупăва хутшăннă. Ялсенче шкул ачисемпе учительсем уйрăмах старта нумайăн тухнă. Анчах Комсомольски 1-мĕш тата 2-мĕш вăтам шкулĕсенчен вĕренекенсем сахалăн пулчĕç. Район центрĕнче мĕн чухлĕ организаци-предприяти, вĕсенче ĕçлекенсене пĕрне те сывă пурнăç йĕрки интереслентермест-ши. Кирек мĕнле ăмăртура та медицина ĕçченĕсем кирлех, районти тĕп больницăран вара никама та чупу иртекен çĕре кăларман.
Малашнехи спорт уявĕсене халăх нумайрах хутшăнасса, вĕсем кирлĕ шайра иртессе шанас килет.
Источник: "Каçал Ен"