25 сентября 2010 г.
Ачасене çемьерех хăварас тесе республикăра та, районта та тивĕçлĕ утăм сахал мар йышăнаççĕ. Апла пулин те интернат учрежденийĕсенчи шăпăрлансен шучĕ чакни сисĕнмест-ха. Нумайăшĕ вĕсенчен çемьесенче пурăнаймасть, хăйсене кун çути кăтартнă, вĕсен прависемпе интересĕсене хÿтĕлеме, ачисене воспитани парса ÿстерме тивĕç çывăх çыннисен ăшшине, хÿттине туяймасть.
Ачана тимлĕх, ачашлăх кирлĕ. Пурин те вĕсен юратас, хăйсене юратнине туяс килет. Çакна вара çемье кăна пама пултарать.
Юлашки çулсенче ачасене усрава парассин çĕнĕ тĕсĕ вăя кĕме пуçларĕ: усрама илекен çемье. Çакăн пек юхăм пирĕн районта та сарăлнă.
Комсомольскинче пурăнакан Надежда Юрьевнăпа Вячеслав Геннадьевич Григорьевсем виçĕ ача – икĕ хĕр ачапа пĕр арçын ача çемьене усрава илнĕ. Ачаш сăмахсем каласа шăннă чунĕсене ăшăтас, йывăр шăписене çăмăллатас тесе илнĕ те ĕнтĕ вĕсем хăйсем патне пурăнма ултă çулхи Станислава, тăватă çулхи Марийăпа виçĕ çулхи Валерийăна. Шăпăрлансем пĕр çемьерех çуралнă.
Акă сентябрĕн 18-мĕшĕнче Канаш хулинчи ача çуртĕнче усрава илнĕ çемьесене «Моя семья — моя радость» уява пуçтарчĕç. Унта Тăвай, Елчĕк, Йĕпреç, Шăмăршă, Патăрьел, Комсомольски, Канаш районĕсенчен тата Канаш хулинчен – пурĕ 8 команда пухăнчĕ. Пирĕн районтан çак мероприятие Григорьевсен çемйи хутшăннă. Вĕсем тĕрлĕ конкурссенче палăрса «Самая веселая семья» номинаципе мала тухса Хисеп грамотине тата спорт инвентарĕсене илме тивĕç пулнă.
Шăпа кÿрентернĕ ачана пулăшмалли меслет вăл — çемье хÿттине илсе тăванлăх ăшшине туйтарасси. Çавăн пек тĕллевпе пурăнаççĕ те ĕнтĕ Григорьевсем.
Источник: "Каçал Ен"