22 сентября 2010 г.
Раççейри хăй тĕллĕн вĕреннĕ талантлă художниксем тата профессионаллă дизайнерсем виçĕ уйăх Пĕтĕм Раççейри халăх çыравĕн талисманне ÿкерес тĕлĕшпе тăрăшрĕç. Конкурса çĕр-шывăн тĕрлĕ кĕтесĕсенчен 500 ытла ÿкерчĕк килнĕ. 126-шĕ çеç конкурс условийĕсене тивĕçтернĕ. Ÿкерчĕксенче ытларах кăткăсене, аистсене, пыл хурчĕсене, упасене, чĕрĕпсене тата кушаксене сăнланă. Çавăн пекех кенгуру, осьминог, матрешка, йăвача та талисман пулма пултарать текенсем пур. Пуринчен ытларах çăмартаран тухакан чĕпсене тата кĕркунне вĕсен йышне чăх шутланине сăнланă. Художниксем хăйсен персона-жĕсене ятсем панă, сăнарласа кăтартнă, вĕсене шут шăрçисем, кăранташсем, çырав хучĕсем тыттарнă. Хăшĕ-пĕри пĕчĕк историсем те шутласа тупнă.
«Комсомольская правда» хаçатăн сайтне вырнаçтарнă 10 ÿкерчĕкрен çĕнтерÿçе суйласа илме тивнĕ. Росстат тата «Комсомольская правда» хаçат представителĕсенчен тăнă жюри çĕнтерÿçе палăртнă. Пĕтĕм Раççейри халăх çыравĕн талисманĕ — хаваслăн кулакан, алă сулса саламлакан арçын ача. Унăн авторĕ — Ярославль хулинчи Ольга Беляева. Жюри шучĕпе вăл «Раççее кашни кирлĕ» текен слогана ăнăçлăрах уçса панă.
Çитес кунсенче талисманлă информациллĕ листовкăсем халăх патне çитĕç.
Источник: "Каçал Ен"