18 сентября 2010 г.
Йăлана кĕнĕ йĕркепе, сентябрĕн 15-мĕшĕнче Чăваш Енĕн кăнтăр районĕсенчи хаçат редакцийĕсенче ĕçлекенсен çуллахи спорт вăййисен спартакиади иртрĕ. Йĕпреçри «Патвар» физкультурăпа спорт комплексĕ журналистсене пуçтарчĕ. Ытти çулсенче спартакиадăна çу кунĕсенче уçă сывлăшра йĕркелекенччĕ. Шăрăх çанталăка пула Йĕпреç районĕнче вăрмансем çуннипе кăçал вăйăсем хăй вăхăтĕнче пулаймарĕç. Унта районсенчи хаçат ĕçченĕсем пĕр-пĕрне курма, вăй-халне тĕрĕслеме çав тери хавас пулчĕç. Хăнасене Йĕпреç районĕн «Çĕнтерÿшĕн» хаçатăн тĕп редакторĕ Константин Алимасов, район администрацийĕн пуçлăхĕн çумĕ Вячеслав Михалик, «Поддержка» страхлакан компани ертÿçи Меропия Александрова тата ыттисем саламаланă хыççăн вăйăсем пуçланчĕç. Дартспа армреслингра «Каçал ен» хаçатăн ĕçченĕсемпе танлашакансем пулмарĕç. Мини-футболта «Канаш ен» журналисчĕсем çаврăнăçуллăрах пулни палăрчĕ. Вырăнтан тăршшĕне сикме, канат туртма тиврĕ. Хамăрăн бассейн çук пулсан та, ăмăртмалла ишессипе те маххă памарăмăр, ар çынсем хушшинче иккĕмĕш, хĕрарăмсенчен виççĕмĕш вырăн йышăнтăмăр.
Йĕпреç район хаçачĕн тĕп редакторĕпе К.Алимасовпа Н.Михайлов тĕп судья ăмăртусен пĕтĕмлетĕвĕсемпе паллаштарчĕç. Пĕрремĕш вырăна Вăрнар районĕнчи «Çĕнтерÿ çулĕ» хаçатăн ĕçченĕсем çĕнсе илчĕç. «Каçал ен» хаçат ĕçченĕсем иккĕмĕш пултăмăр. Виççĕмĕш вырăнта — спартакиада хуçисем, йĕпреçсем.
Çĕнтерÿçĕсене Дипломсемпе тата асăнмалăх парнесемпе чысларĕç. Тепĕр çул çакăн пек мероприяти кăçалхи çĕнтерÿçĕсен патĕнче, Вăрнарта, ирттерме палăртрĕç.
Источник: "Каçал Ен"