08 сентября 2010 г.
«Юпа уйăхĕн 14—25-мĕшĕсенче Пĕтĕм Раççейри халăх çыравне ирттерме республикăри хула-районсем пĕтĕмĕшле хатĕрленсе çитнĕ»,— çапла пĕтĕмлетрĕç пысăк мероприятие йĕркелес енĕпе ĕçлекен правительство комиссийĕн ларăвĕнче.
Чăваш Республикин экономика аталанăвĕпе суту-илÿ министрĕн тивĕçĕсене пурнăçлакан — комисси председателĕн çумĕ Иван Моторин пĕлтернĕ тăрăх, Чăваш Енре 200 çырав, 799 инструктор, 3195 шутлав, 627 стационар участокĕсем йĕркеленĕ. Çырав пункчĕсем валли 497 пÿлĕм уйăрнă, вĕсене тивĕçлĕ шая çитернĕ. Халăхăн ятарлă ушкăнĕллĕ тытăмсенче 29 шутлав участокĕ туса хунă, 29 çыравçа çирĕплетнĕ. Çырав вăхăтĕнче пÿлĕмсене арендăна илме, вĕсене хураллама, çыхăнупа, транспортпа тивĕçтерме ятарлă тытăмсемпе килĕшсе татăлнă.
— Кăçалхи çыравра 5570 çын ĕçлĕ, çак йышран 4395-шĕ çыравçăсем. Должноç кандидачĕсем пурте шалти ĕçсен органĕсен тĕрĕслевĕ витĕр тухнă. 17 районта 30 çынна списокран кăларма тиврĕ. Çыравçăсен ытларах пайĕ — аслă шкулсен студенчĕсем, предприяти-организаци, ял тăрăхĕсен администрацийĕсен ĕçченĕсем, ĕçсĕррисен шутне лекнисем. Вĕсене пурне те обязательнăй йĕркепе вĕрентнĕ»,— паллаштарнă комисси председателĕн çумĕ Эльвира Максимова.
Çыравçăсене кĕтмен инкек-синкекрен (йытă çыртсан, алă-урана хуçсан, суранлансан тата ытти те), Эльвира Геннадьевна каланă тăрăх «ВСК» компанире 20 пин тенкĕлĕх страхланă. Кунсăр пуçне кăмăл пуррисем тÿлеве 100 пин тенке те çитерме пултараççĕ. Куншăн вĕсен хăйсен кĕсйинчен 50—70 тенкĕ çеç кăларса хума тивет. Çыравçăсене пурлăхпа тата техникăпа тивĕçтерес ĕç те вĕçленсе пырать. Çырав материалĕсене автоматизаци мелĕпе тĕрĕслеме ха-тĕрленсе çитнĕ. Кĕçех Чăвашстата хатĕр хутсене пăхакан ятарлă оборудовани килмелле. Федераци бюджечĕ шутĕнчен республикăна 18 пин агитаци плакачĕ ярса панă. Шупашкарта пилĕк реклама баннерĕ вырнаçтарма палăртнă. Çавăн пекех çыравпа çыхăннă пĕлтерÿсем районсемпе ытти хулара та пулĕç.
Патшалăх пĕлтерĕшлĕ пулăма тивĕçлĕ ирттерме хатĕррине пĕлтерни ĕç вĕçленнине кăтартмасть. Правительство комиссийĕн членĕсем ларура видео-конференци мелĕпе районсенчи ĕçтешĕсемпе çыхăнчĕç. Хăш-пĕр çĕрте çитменлĕхсем пуррине, вĕсене çитес вăхăтрах пĕтермеллине палăртрĕç. Çавна май авăн уйăхĕнче хатĕрленÿ мероприятийĕсене мĕнле шайра йĕркеленине палăртас тĕллевпе çырав умĕнхи тĕрĕслев ирттерме йышăннă.
Тепĕр саманта уйрăммăн палăртса хăварасшăн: авăн уйăхĕн 5-мĕшĕнчен çыравпа çыхăннă ыйтусем, канăçсăрлантаракан самантсем пулсан кирек хăш вăхăтра та хурав илме май пулĕ. Çак кунтан Раççейре те, Чăваш Енре те «хĕрÿ лини» ĕçлеме тытăнать. Федераци шайĕнче 8-800-200-14-25, республика шайĕнче 8-800-707-69-99 телефонсемпе шăнкăравласа калаçма пулать.
Источник: "Каçал Ен"