01 сентября 2010 г.
Кашни çулах вĕренÿ çулĕ умĕн август уйăхĕнче вĕрентекенсен конференцине ирттересси йăлана кĕнĕ. Кăçал вăл августăн 27-мĕшĕнче районти Культурăпа кану центрĕнче «Учитель — важнейший фактор инновационного развития образования» ятпа пулчĕ. Кунта районти вĕрентÿ учрежденийĕсенчи педагогсен делегацийĕсем килсе çитрĕç. Конференцие Чăваш Республикин культура, национальноçсен ĕçĕсен, информаци политикин, архив ĕçĕн министрĕ Р.М.Лизакова, район пуçлăхĕ Г.Ф.Волков, вĕрентÿ пайĕн начальникĕ Н.А.Максимов, «Çĕр улмие мухтав» агрофирма» ертÿçи, Чăваш Республикинчи вĕрентÿри попечительсен союзĕн членĕ Х.С.Идиатуллин хутшăнчĕç. Чи малтанах район администрацийĕн вĕрентÿ пайĕн начальникĕ пĕлтĕрхи кăтартусемпе паллаштарчĕ, иртнĕ çулхипе танлаштарчĕ.
«Паянхи куна районта шкулсенче 323 педагог ĕçлет. Вĕрентÿ структурин стандартне çĕнетнĕ май, учительсем çулсеренех хăйсен квалификацине те ÿстерсех пыраççĕ. Вĕсем пултаруллисен конкурсĕсене те активлă хутшăнаççĕ, район чысне çÿлти шайра хÿтĕлеççĕ. Акă, пилĕк çулта районти 19 учитель Раççейри чи лайăх учительсен шутне кĕме пултарчĕ»,— пуçларĕ докладне Николай Аркадьевич. Чăнах та, асăннă тапхăрта Л.Н.Глинкина (Комсомольски 2-мĕш вăтам шкулĕ), В.Г.Зайцева (Хирти Явăш тĕп шкулĕ), С.В.Михайлова, З.Г.Чернова (Комсомольски 1-мĕш вăтам шкулĕ), Т.И.Волкова, С.В.Антонов (Александровка тĕп шкулĕ), Н.А.Смирнова (Хирти Мăнтăр вăтам шкулĕ), Р.Р.Мезитова (Чĕчкен тĕп шкулĕ), Е.Г. Басников (Тăманлă Выçли тĕп шкулĕ) тата ыттисем те лайăххисен йышĕнче. Педагогика ĕçĕнче пултарулăхпа палăрнăшăн кăçал та районти ултă учитель Чăваш Республикин Президенчĕн 50 пинлĕх грантне илме тивĕç пулнă. Вĕсем: Л.Г.Галкина, В.Н.Петров, А.Ф.Мамуткин (Комсомольски 1-мĕш вăтам шкулĕ), С.В.Антонов (Александровка тĕп шкулĕ), Н.С.Сахров, В.Х.Камалетдинов (Урмаел вăтам шкулĕ).
Вĕренекенсен çитĕнĕвĕ те савăнтарни палăрчĕ район администрацийĕн вĕрентÿ пайĕн начальникне. Акă, иртнĕ вĕренÿ çулĕнче 1062 ача олимпиадăсене хутшăннă. Районта мала тухнисем республика шайĕнчи олимпиадăсене хутшăнса япăх мар кăтартусем тунă. Çулран çул республикăра призерсен шу-тĕнче пулнă Комсомольски 2-мĕш вăтам шкул вĕренекенĕ Анастасия Антонова (наставникĕ — С.В.Антонов) обществознанипе пĕрремĕш, Аслă Чурачăк вăтам шкул вĕренекенĕсем Эльвира Гайнулловăпа Резине Салеева (наставникĕ — Р.Р.Мезитова) тутар чĕлхипе тата литературипе пĕрремĕшпе виççĕмĕш, Комсомольски 2-мĕш вăтам шкул вĕренекенĕсем Мария Минина (наставникĕ – Г.Н.Петров) астрономипе иккĕмĕш, Ольга Боровкова (наставникĕ — А.В.Мухина) биологипе виççĕмĕш, Урмаел вăтам шкул вĕренекенĕ Эльвира Тазетдинова (наставникĕ – М.Г.Арсентьева) тутар чĕлхипе тата литературипе иккĕмĕш вырăнсене тухнă.
Районти вĕренекенсем регионсем хушшинче ирттерекен олимпиадăсене те хастар хутшăннă, хутшăнаççĕ те. Унта чăваш сăмахĕпе Елена Ильина (Комсомольски 1-мĕш вăтам шкулĕ), Мария Мининапа Алексей Емельянов (Комсомольски 2-мĕш вăтам шкулĕ), Анастасия Данилова (Çĕнĕ Мăрат вăтам шкулĕ) пĕрремĕш вырăн йышăнма пултарчĕç. Çак ăста ачасене А.В.Прокопьева, С.Г.Индюкова, З.В.Бархонова хатĕрленĕ. Тутар сăмахĕпе ирттернĕ олимпиадăра вара Аслă Чурачăк вăтам шкулĕнче вĕренекен Эльвира Гайнуллова (наставникĕ — Р.Р.Мезитова) лайăх кăтартусемпе палăрнă, пĕрремĕш вырăна çĕнсе илнĕ. Н.А.Максимов Комсомольски 2-мĕш тата 1-мĕш, Çĕнĕ Мăрат, Аслă Чурачăк вăтам, Александровка, Тăманлă Выçли тĕп шкулĕсенчи учительсем вĕренекенсене олимпиадăсене тĕплĕ хатĕрленине палăртрĕ.
Ачасен пĕлĕвĕн тĕп результачĕ — Пĕтĕмĕшле патшалăх экзамен кăтартăвĕсем. Вĕренекенсем çак тĕллевпе 10-мĕш класра профиллĕ предметсене суйласа илеççĕ. «Районти шкул ачисем 12 предметпа ППЭ пачĕç. Мана ют чĕлхепе тата географипе пĕр ача та ППЭре хăйĕн пĕлĕвне кăтартма суйласа илменни тĕлĕнтерет. Çак предметсемпе вĕрентекенсем! Ăçта сирĕн ĕçĕр, пултарулăх;» — çирĕп ыйтрĕ Николай Аркадьевич, ку енĕпе ачасене курăмлă пулăшу кÿмеллине палăртса. Унăн сĕнĕвĕсене учительсем çĕнĕ вĕренÿ çулĕнче шута илеççех пулĕ.
Районти 22 шкултан 18-шĕнчи ачасем олимпиадăсене пур предметсемпе те хутшăннă. Асанкасси вăтам тата Александровка тĕп шкулĕсем астрономипе, Аслă Чурачăк вăтам шкулĕ экономикăпа, Хирти Явăш тĕп шкулĕ ют чĕлхепе тата обществознанипе, Хырхĕрри тĕп шкулĕ вырăс чĕлхипе, астрономипе тата химипе пĕр вĕренекене те олимпиадăна хутăштарман.
Вĕрентÿ учрежденийĕсен педагогĕсем кăçал ППЭ аван тытнă. Вĕсен кăтартăвĕсем республика шайĕнчен пăртак пысăкрах: республикăра – 76 балл, районта – 76,5 балл.
Иртнĕ вĕренÿ çулĕ вăхăтĕнче районта 22 спорт мероприятийĕ пулнă. Унта пурĕ 4400 вĕренекен хутшăннă. Спорт ăмăртăвĕсене тăтăшах йĕркелени ачасен канăвне усăллă ирттерме май парать.
Хушма пĕлÿ паракан цен-трсенче ĕçлекенсене те асăнчĕ вĕрентÿ пайĕн пуçлăхĕ. Унта 18 кружок ĕçлет, 334 ача çÿрет. Уйрăмах Е.Г.Басников, М.Н.Шишкина, В.Г.Зайцева, В.М.Салаев, В.Г.Константинов, Т.Н.Герасимова, Н.А.Петрова кружоксене ертсе пыракансем пултаруллă.
Н.А.Максимов спортпа çар вăййисенче «Орленокпа» «Зарницăра» палăрнă Урмаел, Комсомольски 2-мĕш , Шурут вăтам, Александровка, Тăманлă Выçли тата Анат Тимĕрчкасси тĕп шкулĕсенче вĕренекенсемпе вĕрентекенсене ырăпа аса илчĕ, уйрăмах çакăнта пултарулăхпа палăрнă Татьяна Ивановна Волковăпа Сергей Витальевич Антонова мухтарĕ. Тата ытти нумай ыйтăва хускатрĕ Николай Аркадье-вич.
Малалла пухăннисем умне Комсомольски 1-мĕш вăтам шкулĕн вĕрентекенĕ В.Г.Гордеев, Чĕчкен тĕп шкулĕн директорĕ А.Г.Гибатдинова тухса калаçрĕç, шкулсен ĕçĕ-хĕлĕпе паллаштарчĕç.
Ун хыççăн ЧР культура министрĕ пултаруллă педагогсене наградăсем парса чысларĕ. В.Г.Гордеев (Комсомольски 1-мĕш вăтам шкулĕ), Г.А.Ченакина (Хирти Мăнтăр вăтам шкулĕ), А.А.Яковлев (район администрацийĕн вĕрентÿ пайĕн начальникĕн çумĕ) Чăваш Республикин Патшалăх Канашĕн, Н.В.Сереброва, В.П.Автономов (Комсомольски 1-мĕш вăтам шкулĕ), З.В.Ксенофонтова («Колосок» ача сачĕ), Ф.Э.Камалюкова (Урмаел вăтам шкулĕ), Л.В.Владимирова (Хырай Ĕнел вăтам шкулĕ), М.В.Иванова (район администрацийĕн вĕрентÿ пайĕ) Чăваш Республикин Вĕрентÿ тата çамрăксен политикин министерствин Хисеп грамотисене тивĕçрĕç. «Шкул ачисем хăвăр пекех яланах шыравра пулччăр. Лайăх кăтартусем, пĕлÿ патне ăнтăлакан пултаруллă вĕренекенсем сунатăп!»— терĕ Роза Михайловна, пухăннисене çывхарса килекен Пĕлÿ кунĕпе саламласа.
Конференцире район администрацийĕн Хисеп хучĕсене маттур педагогсене парса чыслама та манмарĕç, тата ытти ыйтусене те сÿтсе яврĕç.
Источник: "Каçал Ен"