01 сентября 2010 г.
Çак кунсенче çумăр пăртак та пулин çукаласа тăчĕ. Çителĕксĕр пулин те, ял ĕçченĕсем нÿрĕк татах та пуласса шанаççĕ. Районти ял хуçалăх предприятийĕсем 1700 гектар çине кĕр тыррисем акнă. Ку ĕç малалла пырать. «Труд» ЯХПК 330 гектар, «Восток» 300 гектар, «Дубрава» 180 гектар çинче ăна пурнăçланă.
Пур хуçалăхра та çĕртме тăваççĕ. 11 пин гектар сухаланă. Яланхи пекех «Урожай», «Восток», «Труд», «Рассвет» пĕрлешÿллĕ хуçалăхсем, Минатуллинăн фермер хуçалăхĕнче çĕртме тумалли çĕр улми тата выльăх кăшманĕн лаптăкĕсем çеç юлнă.
«Иккĕмĕш çăкăр» кăлармалли вăхăт çитнĕ ĕнтĕ. Ку ĕç районти 11—12 хуçалăхра пуçланнă, хăшĕ-пĕри паян-ыран тытăнаççĕ. Тухăç савăнтармасть. Гектартан 45—80 центнер çеç пуçтарса илеççĕ. Иртнĕ çулхипе танлаштарсан 2—3 хут сахалрах. Çĕр улмин пĕр килограмĕн сутлăх хакĕ паянхи кун 15—16 тенкĕпе танлашать. Продукци сутмалăх та çитмест.
Источник: "Каçал Ен"