25 августа 2010 г.
Тĕрлĕ ведомство специалисчĕсенчен йĕркеленĕ ятарлă комисси шкулсемпе ытти пĕлÿпе воспитани паракан учрежденисенче пулса çĕнĕ вĕренÿ çулне мĕнле хатĕрленнине тĕрĕсленĕ. Пĕлтернĕччĕ ĕнтĕ, унта лару-тăру ăнăçлă. Комисси чи лайăххисене те палăртнă. Вăтам шкулсем хушшинче хырайĕнелсем пĕрремĕш вырăн йышăннă. Хиртимăнтăрсемпе урмаелсем иккĕмĕш тата виççĕмĕш тесе палăртнă.
Пĕтĕмĕшле пĕлÿ паракан тĕп, пуçламăш тата хушма пĕлÿ паракан учрежденисенчен Александровка тĕп шкулĕ мала тухнă. Анаттимĕрчкассисем иккĕмĕш, йÿçшăхальсем виççĕмĕш пулнă.
Пĕрремĕш номерлĕ «Колосок» тата «Лейсан» ача сачĕсем ача-пăчана кĕтсе илме лайăх хатĕрленнине çирĕплетнĕ.
Источник: "Каçал Ен"