18 августа 2010 г.
Районта спорта юратакан чылай. Çакна вĕсем тĕрлĕ ăмăртусенче туллин кăтартса параççĕ. Ялти акатуйсенче, республика, Раççей шайĕнче те палăраççĕ.
Çавăнпах пулĕ августăн 14-мĕшĕнче Физкультурниксен уявĕ ячĕпе ирттернĕ йăлана кĕнĕ ăмăртăва та спортсменсем, куракансем йышлăн пуçтарăнчĕç. Старта тăма хатĕрленекенсене, сывă пурнăç йĕркине тытса пыракансене район пуçлăхĕ Г.Волков, «Единая Россия» партин районти политсовечĕн секретарĕ В.Н.Гаврилов, районти вĕрентÿ пайĕн физкультурăпа спорт енĕпе ĕçлекен тĕп специалисчĕ Е.А.Тихонов саламларĕç, финишра малта пулма ăнăçу, хавхалану сунчĕç.
Чи малтанах 100 метрлă дистанцире ар çын ачасем тупăшрĕç. Кунта чи лайăх кăтарту Комсомольски 2-мĕш вăтам шкулĕнчи Д.Воробьев турĕ. Ун хыççăн «Луч» ЯХПК спортсменĕ Э.Иванов çитрĕ. Çĕнĕ Мăрат вăтам шкулĕн вĕренекенĕ А.Чубуков виççĕмĕш кăтарту турĕ.
Хĕрсем те маттур пулчĕç. Комсомольски 1-мĕш вăтам шкулĕнчи А.Владимировăна çитекенни пулмарĕ. А.Табакова (Комсомольски), И.Андреева («Луч» ЯХПК) иккĕмĕш тата виççĕмĕш вырăнсене çĕнсе илчĕç.
400 метрлă дистанцире «Луч» ЯХПК спортсменне Э.Иванова хăваласа çитекенни пулмарĕ. С.Прокопьев (Хирти Сĕнтĕр), А.Мартынов (Александровка) ун хыççăн финиша çитрĕç.
Ветерансем çамрăксене тĕслĕх кăтартаççĕ. 50—60 çулта пулсан та вĕсем 400 метрлă дистанцие старта тăчĕç. Пĕр-пĕрне нихăшĕ те парăнасшăн пулмарĕ. Н.Сахровпа (Урмаел) А.Давыдов («Дружба») финиша пĕр вăхăтрах çитсе пĕрремĕш тата иккĕмĕш вырăнсене пайларĕç. А.Горбунов (Комсомольски) виççĕмĕш пулчĕ.
Тăршшĕне сиксе Анат Ти-мĕрчкассинчи Э.Иванов пĕрремĕш вырăн йышăнчĕ. Комсомольски 2-мĕш вăтам шкулĕнчи Д.Воробьев иккĕмĕш вырăн çĕнсе илчĕ. Асанкасси спортменĕ В.Максимов виççĕмĕшне юлчĕ. Каласа хăварни те вырăнлă пулĕ. Вуншар çул каялла Е.Тихоновăн ку енĕпе тунă рекордне çĕнетекенсем паянхи кун та çук-ха. Вăл 6 метр та 40 сантиметр сикнĕ пулсан, хальхи чемпион 5 метр та 90 сантиметра çеç парăнтарма пултарчĕ.
Тăршшĕне сикес енĕпе хĕрсем хушшинче И.Андреева («Луч» ЯХПК), А.Владимирова (Комсомольски 1-мĕш вăтам шкулĕ), И.Исакова (Комсомольски) палăрчĕç.
Хĕрарăмсем 1000 метра чупрĕç. Н.Чернова (Тукай ялĕ), И.Исакова (Комсомольски ялĕ), М.Сорокина (Тăманлă Выçли ялĕ) малти виçĕ вырăна çĕнсе илчĕç.
2000 метрлă дистанцире ар çынсем тупăшрĕç. Кунта чи çивĕччи Александровкăри А.Мартынов пулчĕ. С.Петров (Хирти Сĕнтĕр) иккĕмĕш вырăн йышăнчĕ.
Мини-футбол вăййисене 13 команда хутшăннă. Вĕсенчен чи ăсти — «Дружба» ЯХПК команди. Комсомольски 1-мĕш вăтам шкулĕн тата Кĕçĕн Каçал командисем ун хыççăнхи вырăнсене юлчĕç.
Волейболла выляса ар çынсенчен Хирти Сĕнтĕр ял поселенийĕн командине парăнтараканни пулмарĕ. Александровкăсем иккĕмĕш, асанкассисем виççĕмĕш вырăнсем йышăнчĕç.
Хĕрарăмсенчен Комсомольски 1-мĕш вăтам шкулĕн команди 1-мĕш вырăна вĕçертмерĕ. Комсомольски 2-мĕш вăтам шкулĕн спортсменкисене, Хирти Сĕнтĕр ял поселенийĕн командине хыçа хăварчĕç.
Пневматикăлла винтовкăран персе Александровка тата Асанкасси ял поселенийĕсен пуçлăхĕсем В.Волковпа Н.Карпов 1-мĕш тата 2-мĕш вырăнсене йышăнчĕç.
Шашкăна юратакансем хăмасем умне ларчĕç. Чи нумай очко пухса кунта Çĕнĕ Сĕнтĕрти ăста шашист С.Зайцев чемпион ята çĕнсе илчĕ. Иккĕмĕш вырăнта — С.Красилов (Хирти Мăнтăр). Кĕçĕн Каçалти В.Смирнов виççĕмĕш пулчĕ.
Александровка, Хирти Сĕнтĕр, Асанкасси ял поселенийĕсенчен, «Луч» ЯХПКран спортсменсем уява йышлăн хутшăнни савăнтарать. Ытти предприяти-организацисене, шкулсене, ял хуçалăх предприятийĕсене те, ял поселенийĕсене те вĕсенчен тĕслĕх илме сĕнетпĕр.
Источник: "Каçал Ен"