18 августа 2010 г.
Вуншар çул каялла райпон çăкăр завочĕ районти пур магазина та çăкăрпа тивĕçтерсе тăнă. Ун чухне ку продукци çитмен те. Пахалăхĕ кирлĕ шайра пулман пулин те ăна туяннă. Тепĕр чухне лавккасем умĕнче çăкăр машинине кĕтсе кун кунланă.
Çак кунсенче «Хлебозавод» ОООна çитсе куртăм. Тĕлĕнмелле улшăнусем тунă унта. Халĕ паянхи кун ыйтăвне тивĕçтерекен оборудованисĕр, çĕнĕ цехсемсĕр пахалăхлă, халăх кăмăлне каякан продукци кăлараймастăн. Вĕсемсĕр вара хатĕр тавара туянакансем те пулмаççĕ.
Ку енĕпе «Хлебозавод» ОООн кăткăслăх çук. Кăçалхи 7 уйăхра 288 тонна çăкăрпа булка изделийĕсем пĕçерсе кăларнă. 167 тонна кондитер изделийĕ клиентсем патне çитернĕ. 5 тонна пулă тăварласа сутнă. Кăçал çанталăк шăрăх тăрать. 10 тонна квас хатĕрленĕ.
«Хлебозавод» ОООра 34 тĕрлĕ кондитер продукцийĕ, 32 тĕрлĕ çăкăрпа булка изделийĕсем хатĕрлеççĕ. Вĕсене хамăр районти пур ялти лавккасенче те сутаççĕ. Кунсăр пуçне Шупашкарти пысăк магазинсене те ăсатаççĕ. Çăкăр завочĕн продукчĕсене Патăрьел, Елчĕк, Шăмăршă, Канаш районĕсенче те хапăлласа йышăнаççĕ. Тутарстан республикин пирĕнпе кÿршĕллĕ районĕсенчи суту-илÿ точкисемпе те туслă çыхăну тытаççĕ. «Енчен те пирĕн завод туса илекен продукцин 20 проценчĕ районта юлсан, ытти урăх çĕре каять. Ку пирĕн тавар пахалăхлă пулнине пĕлтерет»,— тет «Хлебозавод» ООО тĕп бухгалтерĕ Р.П.Буланкова. Вăл цехсенчи юсав ĕçĕсем пирки те каласа пачĕ. Предприяти юлашки çулсенче тупăшлă ĕçлет. Ĕç укçине вăхăтра парса пыраççĕ. Вăтам шалу 9 пин тенкĕпе танлашать. Коллективра 46 çын. Пĕтĕм продукцие çынсен кăмăлне каймалла чĕркесе хатĕрлеççĕ. Малтан райпоран автомашинăсене арендăна илнĕ пулсан, халĕ хăйсем çăкăр турттаракан 5 автомобиль туяннă. Унсăр пуçне ют çĕр-шывра туса кăларнă çăкăр пĕçермелли кăмакасемпе пуянланнă.
Çăкăр заводĕнче В.П.Сумзина, Г.Т.Ярхунова кондитерсем, Ю.Г.Иванова, В.Н.Кошкина, Е.Н. Тихонова çăкăр пĕçерекенсем нумай çул ĕçленине палăртрĕç.
Кунти ĕçченсем малашне те район çыннисене кăпăшка çăкăрпа, булкăпа, тутлă кондитер апат-çимĕçĕпе тивĕçтерессе шанатпăр.
Источник: "Каçал Ен"