07 августа 2010 г.
Районти кирек хăш ял поселенине пырса кĕрсен те «Комсомольскинчи РСУ» АХО ĕçче-нĕсен кăтартăвĕсене курма пулать. Культура çурчĕсене, акушерпа фельдшер пункчĕсене, пĕтĕмĕшле çемье врачĕн офи-сĕсене кĕрсен пурте унти хăтлăхпа киленеççĕ. Ку сăмахсене ахальтен каламастăп эпĕ. Мухтас шухăшăм та çук. Вăл сăмахсене ял çыннисем каланинчен илтнĕ.
Ахальтен мар пулĕ район администрацийĕ хăй вырнаçнă çурта юсаса илемлĕх сăнĕ кĕртессине те РСУ ĕçченĕсене шаннă. Ку пĕрремĕш хут анчах мар. Ытти чухне те ку ăсталăхпа палăрнă çак организацири строительсем. Администраци çуртне кĕрсе тухакансем вĕсен ĕçĕпе кăмăллă.
Çак кунсенче В.В.Максимов директорпа курса калаçрăм. «Пултаруллă ĕçченсем чылай пирĕн. Кирек мĕнле ĕçе те тума пултараççĕ. Ăсталăхĕ, тăрăшулăхĕ çитет. Çулталăк пуçланнăранпа çеç район администрацийĕн виçĕ хутĕнче, Комсомольски 1-мĕш вăтам шкулĕнче, Урмаелĕнчи Культурăпа кану центрĕнче, район больницинче юсав ĕçĕсем турăмăр»,— тет Владимир Васильевич.
Эпĕ строительствăра ĕçлекенсене районти Культурăпа кану центрĕнче тĕл пултăм. Кунта Н.Никифорова, Н.Шатова, И.Воробьева, В.Белкова штукатур-малярсем тăрăшатчĕç. Вĕсен ăсталăхне пула çурт стенисем илемлĕ пулаççĕ.
«Комсомольскинчи РСУ» АХО директорĕ хастар та нумай çул тăрăшакан çынсене те палăртрĕ. «Н.Никифорова, И.Воробьева, В.Ванюшкин, Н.Белков чăннипех те коллективра ĕçлесе ырă ят çĕнсе илнĕ. Вĕсем пĕрре те пушă лармаççĕ, ăстаçăсем валли яланах ĕç пур»,— терĕ В.Максимов.
Унти строительсене малашне те ăнăçу сунар. Вĕсем тунă илем хăй патне илĕрттĕр.
Источник: "Каçал Ен"