04 августа 2010 г.
Пирĕн районта çуралса ÿснĕ, каярахпа республика ша-йĕнчи ертÿçĕсенче ĕçленĕ çын чылай. Вĕсенчен пĕри — Николай Иванович Абанин.
Вăл 1947 çулта Луцки салинче çуралнă. Вăрçă хыççăнхи çулсенче кун çути курнă ачасен пурнăçĕ пыл та çу пулман. 1966 çулта Канашри СПТУ пĕтернĕ хыççăн Комсомольскинчи «Сельхозтехника» пĕрлешÿре тăрăшнă. Çартан таврăнсан 1969—1979 çулсенче райпора шоферта тата товароведра ĕçленĕ. Николай Иванович пурнăçне, ĕçĕ-хĕлне суту-илÿ енĕпех çыхăнтарасшăн пулнă. Çавăнпа та вăл куçăмсăр майпа Шупашкарти коопераци техникумне вĕренме кĕнĕ. 1979 çулта ăна ăнăçлă пĕтернĕ хыççăн Н.Абанина çав çулах Комсомольскинчи сăра тата тутлă шывсем туса кăларакан завод директорне (халĕ «Кооператор» производство комбиначĕ) çирĕплетеççĕ. Вăл, шаннă ĕçе тÿрре кăларса, çанă тавăрсах ĕçлет. Çĕнĕ производствăсем хута яма тăрăшать.
1988 çулхи декабрь уйăхĕнче пултарулăхне кура райпо правленийĕн председательне суйлаççĕ. Кунта вăл нумаях ĕçлемест. Николай Ивановича 1990 çулта Шупашкарти универсаллă база директорне çирĕплетеççĕ. Унта ĕçленĕ вăхăтрах Куславкка райпо председателĕн Совечĕн должноçĕнче тăрăшать.
1997 çулта ăна Чăваш потребсоюз Совечĕн членне суйлаççĕ. Хастар ĕçшĕн Ĕçлĕх Хĕрлĕ Ялав орденĕпе, «Раççей потребительсен кооперацийĕнче тÿрĕ кăмăлпа ĕçленĕшĕн» паллăпа наградăланă. Н.А.Абанин — Чăваш Респуликин халăх ыйтăвĕсене тивĕçтерессин тава тивĕçлĕ ĕçченĕ.
Вăл республикăри, районти суту-илÿ системине лайăхлатас, аталантарас тесе чылай ĕç тунă.
Источник: "Каçал Ен"