31 июля 2010 г.
Лайăх юрă-кĕвĕ илтсен чун савăнăçпа тулать, кăмăл çĕкленет. Çакна лайăх ăнланаççĕ Комсомольскинчи Культурăпа кану центрĕн ĕçченĕсем. Ун çумĕнчи агитбригада çак кунсенче тĕрлĕ çĕре çитрĕ, вырма ĕçченĕсене юрă-кĕвĕпе савăнтарчĕ.
«Урожай» колхозăн йĕтемне çитсен кунта хĕрÿ ĕç пынине туйса илтĕмĕр. Тырă куписем аванах пысăк курăнаççĕ. Вĕсем таса, хывăхсăр. Светлана Улжусева бригадир каланă тăрăх, тырă кăçал типĕ килет. Ăна 4 агрегат алласа тасатать. Çынсем икĕ ушкăнпа ĕçлеççĕ. Кашни смена 80-шар тонна тырă кĕлете хывать. 1 гектартан 20 центнер вырса илнĕ, тухăç пурне те савăнтарать. «Урожай» колхоз ĕçченĕсем туслăн ĕçлеççĕ. Тутар Шурут ялĕнчи 3-мĕш бригадăран Евдет Мушарапов водительпе Рамиля Халитова весовщик тулли машинăпа çитрĕç. Вĕсене Светлана Кудряшова кладовщик йышăнчĕ.
Çапла килĕштерсе вăй хурсан ĕç те кал-кал пырать. Ял ĕçченĕсем район центрĕнчен пынă артистсене кăмăлласа йышăнчĕç. Лариса Носова, Инна Полякова, Валентина Тимофеева, Тамара Александрова, Юлия Федорова, Юрий Тихонов, Владимир Павлов шăрантарнă «Ĕçчене савса», «Шăмат кун каçхине», «Каллех килĕ юрату», «Хитре хĕр» юрăсене вĕсем питĕ хавас пулчĕç.
Малалла пирĕн ушкăн «Победа» хуçалăха çитрĕ. Йÿç Шăхаль йĕтемĕнчи çынсем канма ларнăччĕ. Çав вăхăтпа усă курса Н.Архипов хăйĕн агрегатне тĕрĕслесе илме шут тытнă. «Хам пекех вăл, çулĕсем пур унăн, анчах аптрамасть-ха, ĕçлет»,— тет Николай Иванович машинист. Йÿçшăхальсем те кÿршĕсем пекех маттур. Сĕлĕ вĕсен ăнса пулнă — 1 гектартан 25 центнер çапса илнĕ. Ульяновскран качча килнĕ Елена Марова чăвашла ăнланмасть-ха. Апла пулин те çуралнă кунĕпе агитбригада саламланă юрра тăрăшса итлерĕ. Çынна савăнăç кÿни, тимлĕх уйăрни — хăех лайăх пулăм. Пурте ăшшăн сыв пуллашса ăсатрĕç артистсене.
Çĕнĕ Мăрата çитсен пирĕн ушкăн йĕтем тавра çаврăнса çÿрерĕ, машина пиклеттерсе сас пачĕ, анчах пĕр чĕрĕ чун курăнмарĕ. Хуралçă та пулин пулсанччĕ тени те усси пулмарĕ. Пĕр лаша çеç, кăкарăнчăкра тăраканскер, пуçне сĕлтсе кĕтсе илчĕ, çаплипех ăсатса ячĕ. Кăнтăрла çитсе пынăран пурте апата кайнă пуль терĕмĕр.
«Пайгас» хуçалăха яка та тикĕс çул хăвăрт илсе çитерчĕ. Водителĕ, çамрăк та шухăскер, район çулĕсене аван пĕлет иккен. Тăманлăвыçлисем хăнасене тарават пулчĕç. Агитбригада хатĕрленĕ пĕчĕк концерт вĕçленсен тăвăллăн алă çупса тав турĕç, татах килсе çÿреме ыйтрĕç. Аслисемпе юнашар шкул ачисем те тăрăшаççĕ.
Оксана Николаевăпа Мария Сорокина вĕренÿре кăна мар, ĕçре те хастар иккен. Алла тытмалăх укçа пуласса шанаççĕ вĕсем. Шкула кайма тумтир илес шухăшпа хавхаланаççĕ.
Çÿресен-çÿресен хырăм та хыр тăрне хăпарчĕ. Выçăлла юрлама-калаçма пĕртте çăмăл мар. «Восток» ЯХПК столовăйĕн поварĕсене Галинăпа Лена Шиковăсене ăшă сăмахсемпе тав тăвас килет. Тутлă яшкапа, чейпе хăналани артистсен кăмăлне аванах çĕклерĕ. Аякран килнĕ çынсемпе çеç мар, хуçалăх ĕçченĕсемпе те питĕ кăмăллă вĕсем.
Хырхĕрри тата Вăрманхĕрри Чурачăк йĕтемĕсем çинче вăй хуракансем чылаййăнччĕ. Кунта Андрей Петровпа Сергей Пожеданов çамрăк машинистсем пысăк яваплăха туяççĕ, агре- гатсене чăрмавсăр ĕçлеттереççĕ.
Хуçалăхăн тĕп агрономĕ Валерий Петров кĕлете кĕрекен тыррăн пахалăхне тĕрĕслесех тăрать, Валентина Воронкова йĕтем заведующине сĕнÿсем парать.
Пĕтĕмĕшле илсен, пур çĕрте те вырма ĕçĕн çуррине пурнăçланă та ĕнтĕ. Тухăç сахал-и, нумай-и — пур пĕрех тыр-пула вăхăтра пуçтарса кĕртмелле. Ку ĕçре ял хуçалăх специалисчĕсен, çĕр ĕçченĕсен, культура работникĕсен пĕрле пулмалла. Çапла пулсан çеç — çăмăлрах, хаваслăрах.
Источник: "Каçал Ен"