24 июля 2010 г.
«Каçал ен» хаçатăн иртнĕ номерĕнче пичетленнĕ район депутачĕсен Пухăвĕн йышăнăвĕнче Чăваш Республикинчи вырăнти самоуправлени органĕсен пуçлăхĕсене суйламалли куна октябрĕн 10-мĕшĕнче тесе палăртнă. Кăçалхи суйлавăн уйрăмлăхĕсемпе район администрацийĕн ĕçĕсен
управляющийĕ Юрий Всеволодович Скворцов
паллаштарчĕ.
— 18 çул тултарнă кашни çыннăнах суйлава хутшăнма ирĕк пур. Районта пурĕ 17 суйлав округĕ туса хунă, çавăнпа та район депутачĕсен шучĕ те çавăн чухлĕ пулмалла. Ял поселенийĕсен пуçлăхĕсемпе депутачĕсене, халичченхи пекех, халăхпа суйлатпăр.
Паллах, çак пысăк та яваплă ĕçре эпир пултаруллă, тăрăшуллă çынсене курасшăн. Çавăнпах хамăр лайăх пĕлекене, ĕçе чунтан парăнакана пуçлăх тата «халăх тарçин» тивĕçĕсене пурнăçлама шанатпăр. Вĕсем пĕлсе ертсе пынинчен ялсен, урамсен тирпейĕпе илемĕ, хăтлăхĕпе аталанăвĕ кирлĕ шайра пуласси нумай килет.
Малалла уйрăмлăхсем пирки тĕплĕнрех. Ку таранччен район пуçлăхне халăхпа суйланă. Çак çултан вара урăхларах пулать. Пуçлăх пулмалли çынна район депутачĕсем хăйсем хушшинчен палăртаççĕ. Унăн район депутачĕсен Пухăвĕн председателĕн, район пуçлăхĕн ĕçĕсене обществăлла майпа (тÿлевсĕр) туса пымалла пулать.
Тепĕр уйрăмлăхĕ — район администрацийĕн пуçлăхне конкурспа суйласа лартасси. Кандидатурăсене пăхса тухма 9 çынран тăракан ятарлă комисси туса хумалла. Вĕсенчен виççĕшĕ — ЧР Патшалăх Канашĕн, тепĕр улттăшĕ — район шайĕнчи çынсем. Çĕнĕрен суйланнă район депутачĕсен Пухăвĕн пĕрремĕш ларăвĕнчех район пуçлăхĕпе район администрацийĕн пуçлăхĕ контракт туса алă пусаççĕ.
Источник: "Каçал Ен"