21 июля 2010 г.
Иртнĕ ĕмĕрте Анат Тимĕрчкассинче пурăннă Иустина Илларионовнăпа Иван Александрович Ласточкинсем. Вĕсен çемйинче çичĕ ача ÿснĕ. Аслисенчен тĕслĕх илмелли пулнах çав. Ахальтен мар ĕçченлĕх, тÿрĕ кăмăллăх, сăпайлăх, тăрăшулăх ашшĕ-амăшĕнчен ачисене куçнă.
1941 çулта утă уйăхĕнче Ласточкинсен çемйинчеТăван çĕр-шывăн аслă вăрçине виççĕн тухса кайнă: Иван Александровичпа унăн 2 ывăлĕ — Алексейпе Николай. Аслă ачи тепĕр çултан хыпарсăр çухалнă. Кĕçĕнни Николай 1944 çулта Смоленск облаçĕнчи Рудна хулине ирĕке кăларассишĕн пынă хаяр çапăçура паттăррăн пуç хунă.
Ласточкинсен улттăмĕш ачи Владимир 4—5 çултах вăрçа кайнă ашшĕпе пиччĕшĕсем вырăнне ĕçе кÿлĕннĕ. Амăшне пулăшаканĕ пулнă.
— Вăрçă çулĕсенче хирте çĕр улми ани çинче юр ирĕлсе пĕтсенех крахмал пуçтарма тытăнаттăмăр. Сертепе пултран яшкине юратса çиеттĕмĕр. 10—11 çулта чухнех çуллахи вăхăтра тăван колхозра ыттисемпе пĕрле тăрăшса ĕçленĕ. Кăштах çитĕнсен ялтан 27 çухрăмра хĕвел анăç енче вырнаçнă Йĕпреç поселокне вăкăрпа е лашапа тырă леçме çÿреттĕм. Халĕ аса илетĕп те хамăн ачалăха, мĕнле пурăннă-ши тетĕп. Çиме çăкăр çукки те, атă-пушмак, тумтир пулманни те пире çапса хуçайман. Пурнăç илемне çухатман эпир, вăрçă ачисем. Лайăх вĕренсе йĕркеллĕ çын пулма тăрăшнă,— тет халĕ Владимир Иванович Ласточкин. — Нуша кулач çитерет. Кун-çул пире йывăрлăхсене парăнмасăр малалла утма хистерĕ. Никама та шанса ларман, пĕтĕмпех хамăр тунă.
1956—1959 çулсенче çар ретĕнче пулни çамрăка пурнăçра çирĕплĕхе, яваплăха хăнăхтарнă. Шупашкарти электроаппаратура, «Чăваш кабелĕ» заводсенче токарьте 4 çул ĕçлесе вăй-хала пиçĕхтернĕ. Спорта юратакан каччă, малалла вĕренме ĕмĕтленнĕскер, Мускаври физкультура институтне 1969 çулта ăнăçлă пĕтерет. Шупашкарти шкулсенче, Чăваш патшалăх университечĕпе ял хуçалăх институтĕнче, 18-мĕш училищĕре физкультура учителĕнче, преподавательте вăй хурать. Кирек хăш вырăнта ĕçлесен те Владимир Иванович çамрăксене физкультурăпа спорта юратма вĕрентес тесе чунтан тăрăшнă. 1962 çулта В.И.Ласточкин РСФСР Физкультурăпа спорт комитечĕн Хисеплĕ грамотине ахальтен тивĕç пулман. Пур чун хавалĕпе тренировкăсене çÿренĕ, ăмăртусене хутшăннă, ÿсĕм хыççăн ÿсĕм туса пынă. 1997 çулта вăл ЧР тава тивĕçлĕ учителĕ пулса тăнă. Хастар ентешĕмĕр мĕн тунипе çырлахса лармасть. Халĕ вăл тивĕçлĕ канура, ĕçпе спорт ветеранĕ.
2007 çултанпа Владимир Иванович — РФ Физкультурăпа спорт отличникĕ.
Хамăр районти шкулсен физкультура учителĕсем В.И.Ласточкина питĕ лайăх паллаççĕ. Паянхи кун вăл Вĕрентÿ институтĕнче педагогсене аттестацилесе аслă категори паракан комиссин экспертлă ушкăн членĕ шутланать. Владимир Иванович пирĕн пултаруллă физруксене хăй те лайăх пĕлет. Н.Н.Ятманов (Хырхĕрри), Г.Н.Петухов (Асанкасси), В.И.Плешков (Анат Тимĕрчкасси), Т.И.Волкова (Александровка) тата ытти учительсене мухтаса калаçать.
Ĕçпе спорт ветеранĕ яла килсех çÿрет. Тăванĕсемпе, тантăшĕсемпе тĕл пулма юратать. Анчах чуна ыраттаракан пулăмсем пирки пăшăрханмасăр калаçма çук-çке тата. Ялти çырмасем çÿп-çаппа тулса ларнишĕн, вăрçă паттăрĕсене асăнса лартнă палăка тирпейлĕ тытманнишĕн, масар вырăнĕ йĕркесĕр пулнишĕн В.И.Ласточкин питĕ кăмăлсăр. Паллах, унпа пĕр шухăшлисем нумаййăн Анат Тимĕрчкассинче. Çапах та çак çитменлĕхсене пĕтерес тесе ушкăнпа кар тăни сисĕнмест хальлĕхе.
Тÿпере, çÿлте-çÿлте вĕçме çуралнă Ласточкинсен улттăмĕш ачи Владимир. Хăйĕн ĕçĕ-хĕлĕпе, ячĕ-сумĕпе, ырă шухăш-ĕмĕчĕпе тăван ялне, района мухтава кăларать.
Источник: "Каçал Ен"