21 июля 2010 г.
Пирĕн районтан çар службине кайнă çамрăксем тĕрлĕ çĕрте лайăххипе нумай палăраççĕ. Çакна вĕсен тăванĕсем патне янă Тав çырăвĕсем çирĕплетеççĕ.
Ун пек савăнăçлă хыпар нумаях пулмасть Комсомольски ял поселенийĕнче пурăнакан Е.В. Алексеева патне те çитнĕ. 61423 çар чаçĕн командованийĕ Елена Васильевна ячĕпе Тав çырăвĕ янă. Ун айне вăл службăра тăракан çар чаçĕн командирĕ А.Синельников полковник алă пуснă.
«Сирĕн ывăл, Алексей Сергеевич Алексеев, çар тивĕçне тÿрĕ кăмăлпа пурнăçлать. Эсир панă халала тăрăшса тытса пырать. Пирĕн чаçре Алексей пирки ырласа кăна калаçаççĕ. Специальность илнĕскер, çар вĕрентĕвĕнче ун умне лартнă тĕллевсене çирĕп пурнăçласа пырать. Раççей хĕç-пăшаллă вăйĕсем валли кирлĕ пек ывăл çитĕнтернĕшĕн тав тăватпăр»,— тенĕ унта. Тав çырăвĕшĕн Алексей кукамăшĕ те, Альбина Васильевна, питĕ хĕпĕр тенĕ.
Сăмах май, Алексей çар тумĕ тăхăниччен маларах водитель специальноçне алла илнĕ. Комсомольски 1-мĕш вăтам шкулĕнче вĕреннĕ вăхăтрах спортпа тата физкультурăпа туслă пулнă.
Источник: "Каçал Ен"