17 июля 2010 г.
Саша Журавлев мĕн пĕчĕкрен çар тумĕпе çÿрекенсене ăмсанса пăхма юратнă. Хăйĕн ĕмĕтне арçын ача вăрттăнлăхра тытнă-ха. Анчах ашшĕпе амăшĕ ывăлĕ ăçталла туртăннине туйса илнĕ. Киров поселокĕнчен Комсомольски 2-мĕш вăтам шкулне çÿресе Саша тарăн пĕлÿллĕ, çирĕп кĕлеткеллĕ каччă пулса тăчĕ. Вĕренÿре те, спорт ăмăртăвĕсенче те яланах малтисенчен пĕриччĕ вăл.
Вăтам пĕлÿ илни çинчен аттестат парсанах, экзаменсене ăнăçлă тытнă каччă Тольятти хулине хăйĕн докуменчĕсене ярса пачĕ.
Кĕçех вăл — çарпа техника институчĕн строительство факультечĕн 1-мĕш курс студенчĕ. Чăваш каччи кунта та тÿрех тăрăшулăхпа палăрчĕ.
Халĕ ĕнтĕ Александр Журавлев III курса ăнăçлă вĕçлесе тăван киле каникула килчĕ. Ял урамĕпе пыракан çамрăк курсанта курсан ватă çынсем чарăна-чарăна тăрса калаçаççĕ, кам ачи тесе ыйтаççĕ. Чипер хĕрсен чĕри кăлт-кăлт тапса илет — çакăн пек маттур каччăпа туслашма кам хирĕç пултăр; Александр вара тăван ялта хăйне питĕ телейлĕ туять. Каникулта вăхăта усăллă ирттерет. Ашшĕ-амăшне хуçалăх ĕçĕсенче пулăшать. Тамара Васильевнăпа Владимир Анисимович юратнă ывăлĕ çине ытараймасăр пăхаççĕ. Савăнма сăлтавĕ те пурах çав. Вĕсем студентăн «4» тата «5» паллисене çеç мар, курс начальникĕ А.Горбунов çырнă тав сăмахĕсене те вуларĕç.
«Лаша пуласси тихаран паллă, çын пуласси — ачаран»,— теççĕ халăхра. Саша çакăн пек маттур пулнишĕн ашшĕ-амăшĕпе пĕрле ăна вĕрентнĕ учительсем те чунтан хĕпĕртеççĕ.
Вăл малашне те хăйне лайăх енчен палăртасса, çирĕп пĕлÿллĕ офицер пуласса шанатпăр.
Г.Волкова.
Источник: "Каçал Ен"