14 июля 2010 г.
Кăçал октябрьте иртекен çыравччен вăхăт нумаях та юлмарĕ. Çавăнпа та ăнлантару ĕçĕ вăйлансах пырать. Правительство комиссийĕн ларăвĕнче çирĕплетнĕ мероприятисен планĕпе килĕшÿллĕн, ЧР Культура министерстви тата Чăваш наци конгресĕ тепĕр проекта ĕçе кĕртнĕ. Вăл тĕпрен илсен Ульяновск тата Самар облаçĕсенчи, Тутарстан, Пушкăртстан республикисенчи чăваш диаспорисемпе çыхăннă. Ăна чăваш литературин классикĕ К.В.Иванов 120 çул тултарнине те халалланă. Чăваш наци конгресĕпе ЧР Культура министерствин представителĕсенчен, И.Н.Ульянов ячĕллĕ Чăваш патшалăх университечĕн преподавателĕсемпе студенчĕсенчен, ăсчахсенчен, обществăпа культура паллă деятелĕсенчен тăракан пысăк делегаци авточупу ирттернĕ. Вăл Шупашкар хули — Ульяновск облаçĕ — Тутарстан республики — Самар облаçĕ — Пушкăртстан республики — Шупашкар хули маршрутпа пулнă. Тĕп мероприятисем чаплă сăвăç К.В.Иванов çуралса ÿснĕ Пушкăртстан республикинчи Пелепей районĕнчи Слакпуç ялĕнче иртнĕ. Делегаци классик вил тăпри çине чечексем хунă, унăн тата Ухсай Яккăвĕн музейĕнче пулса курнă. Хăйсен хайлавĕсене тата К.В.Ивановăн произведенийĕсене вулакансен, наци костюмĕсен, наци апат-çимĕç конкурсĕсене ирттернĕ.
Çавăн пекех Пелепей район администрацийĕн представите-лĕсемпе 2010 çулхи çыравпа çыхăннă ыйтусене сÿтсе явма çавра сĕтел йĕркеленĕ. Унта çивĕч ыйтусем пулнă. Вĕсем ку тăрăхра пурăнакан чăвашсен чĕлхине, йăли-йĕркине сыхласа хăварасси çинче те чарăнса тăнă.
Источник: "Каçал Ен"