07 июля 2010 г.
Суту-илÿ — çулран-çул аталанса, вăй илсе пыракан отрасль. Юлашки вăхăтра унăн витĕмĕ ÿсни куç кĕретех. Паянхи кун вара сутуçăсен туянакансене тем тĕрлĕ тавар та сĕнме май пур.
Акă июлĕн 2-мĕшĕнче Комсомольски райпо тытăмĕнче ĕçлекенсем «Хуçалăх таварĕсем» магазина юсаса çĕнетнĕ хыççăн савăнăçлă лару-тăрура уçрĕç. Чи малтанах пуçтарăннисен умĕнче район пуçлăхĕ Г.Ф.Волков калаçрĕ, уяв ячĕпе ырлăх-сывлăх, ĕçре ăнăçу сунчĕ. «Райпо ĕçченĕсем халăхшăн тăрăшни куç умĕнчех. Вĕсем тавар туянакансене тĕрлĕрен продукци сĕнеççĕ, ăшă кăмăлпа кĕтсе илеççĕ. Ун тытăмĕнчи суту-илÿ çурчĕсем кунран-кун çĕнелсе пыни те çавна çирĕплетет. Тавар туянакана, паллах, хăтлă лавккасенче мĕн кирлине суйлама та меллĕ».
Малалла сăмах райпо совечĕн председателĕ Е.И.Карпеев илчĕ. Вăл пуçтарăннисене кооператорсен кунĕ ячĕпе саламларĕ, малашнехи тĕллевсене пурнăçа кĕртме ăнăçу сунчĕ. Евгений Иванович «Мастер» ООО дизайнерне К.А.Ахметова магазин çуртне кĕске вăхăтра юсаса çĕнетнĕшĕн тав сăмахĕ каларĕ. Çавăн пекех уява килнисен умĕнче райпо правленийĕн председателĕ Л.А.Сорокина, А.Г.Пыркина заведующи сăмах илчĕç. Ертÿçĕпе пĕрле 6-ăн ĕçлеççĕ кунта. Вĕсем — Люция Яббарова, Наталья Орлова, Сергей Антонов, Линар Габдуллов тата Екатерина Шабанова.
Магазина уçса хĕрлĕ хăйăва кассан район пуçлăхĕ унти кашни кĕтесех çитрĕ. Хăтлă, таса та çутă пÿлĕмсене курнă хыççăн Геннадий Федорович хăйĕн савăнăçне пытармарĕ. «Тавар туянакансем çинчен кăна мар, кунта ĕçлекенсем пирки те манман. Кану пÿлĕмĕсем те хăйсен дизайнĕпе хальхи кун ыйтăвĕсене тивĕçтереççĕ»,— терĕ вăл.
Малалла савăнăçлă лару-тăру «Кĕтне» кафере тăсăлчĕ. Унта кадрсен пайĕн начальникĕ Л.К.Кокшина, С.Ф.Кокорева тĕп бухгалтер, Э.В.Артемьева сăмах илчĕç. «Кашни сутуçăн яланах çакна асра тытмалла: паян — ĕнерхинчен, ыран — паянхинчен лайăхрах ĕçлемелле»,— терĕ Светлана Федоровна, уяв ячĕпе ăшшăн саламласа.
Маттуррисем хушшинче тата та маттуррисем пур. Çак мероприятире суту-илÿ ĕçĕнчи хастарлăхшăн Н.В.Коноваловăна, А.В. Козловăна, М.С.Мальчиковăна, О.В.Шадрина, О.В.Паркована, З.Н.Макаровăна, Э.Ф.Адеевăна, О.Г.Александровăна «Чувашпотребсоюзăн» Хисеп грамотисене парса чысларĕç. Тав хутне Н.А.Малышева илме тивĕçрĕ. О.А.Воронцовăпа С.Н.Толстова вара Раççей Федерацийĕн Хисеп грамотисене парса чысларĕç. «Ĕçри тăрăшулăхшăн» паллăсем те (знаксем) парса хисеп турĕç уявра. Н.Е.Лукина сутуçă 20 çул, Л.А.Константиновăпа Л.А.Сорокина 25 çул, Н.Ф.Кутаранова 30 çул кăлтăксăр ĕçленĕшĕн çак паллăсене тивĕçрĕç. «Чăваш Республикин тата Раççей Федерацийĕн потребкоопераци ветеранĕ» ятсене Йÿç Шăхалĕнчи лавккара нумай çул тăрăшакан Антонина Петровна Илларионовăпа Лидия Борисовна Козлова тивĕçнĕ. Уявра çавăн пекех М.Х.Лепешкин, М.Ф.Шмелева, Е.И.Силанова тата Г.П.Потапова ячĕсене те ырăпа асăнчĕç, вĕсен кăкрисене малашне «За добросовестный труд в потребительской кооперации» паллăсем илем-летĕç. Т.А.Иванова сутуçăн пултарулăхне те палăртрĕç.
Ĕçпе спорт яланах юнашар çÿрет. Çак кун А.Н.Григорьев, Н.С.Артемьев, В.Е.Кашина, Т.В.Ильина, Н.А.Соколов, Г.Н.Краснова, Н.В.Коновалова, Э.Г.Смирнова, В.А.Лаврушкин, О.Г.Александрова райпо тытăмĕнче вăй хуракан спорт тусĕсене те Хисеп хучĕсем тата укçан парне парса чысларĕç.
Источник: "Каçал Ен"