07 июля 2010 г.
Иртнĕ кунсенче Раççей патшалăх банкне йĕркеленĕренпе 150 çул çитнине халалласа Шупашкарти оперăпа балет театрĕнче наукăпа практика конференцийĕ пулнă. Унта пирĕн районтан банк системин ĕç ветеранĕ Ревокат Прохорович Моисеев та хутшăннă. Чи малтанах пухăннисене Чăваш Республикин Наци банкĕн Председателĕ А.В.Ухов Раççей патшалăх банкĕн истроийĕпе, аталанăвĕпе, унăн экономикăри пысăк пĕлтерĕшлĕ ĕçĕсемпе паллаштарнă.
Наукăпа практика конференцийĕн ĕçне Чăваш Республикин Президенчĕ Н.В.Федоров та хутшăннă. Вăл банксен ĕçĕ пысăк пĕлтерĕшлĕ пулнине палăртнă, малашне тата та тухăçлă ĕçлеме ырлăх-сывлăх, вăй-хал суннă. Банк ĕçне пысăк хак панă май, ĕçре ытларах палăрнисене Президент Хисеп грамотисем парса хавхалантарнă. ЧР Патшалăх Канашĕн Председателĕ М.А.Михайловский те банк ĕçĕнче палăрнисене наградăсемпе чысланă.
Раççей банкĕ 150 çул тултарнă май республикăри ытти банк ертÿçисем, ветерансем те саламлă сăмахсем каласа малашне татах та ытларах пĕр-пĕринпе килĕштерсе ĕçлемеллине палăртнă.
Оперăпа балет театрĕн артисчĕсем пухăннисене илемлĕ юрăсемпе савăнтарнă.
Источник: "Каçал Ен"