07 июля 2010 г.
Çурхи уй-хир ĕçĕсем вĕçленнĕ хыççăн республикăн тĕп хулинче Комсомольски, Елчĕк тата Патăрьел районĕсен ентешлĕхĕсен уявне ирттересси ырă йăлана кĕнĕ ĕнтĕ. Пĕлтĕр пирĕн район çыннисем унта пĕрремĕш хут хутшăннăччĕ.
Кăнтăр районĕсенче — Комсомольски, Елчĕк тата Патăрьел çĕрĕсенче çуралса ÿснисем, кунта пурăнакансем ĕмĕртен пĕр-пĕринпе туслă, интересĕсемпе тĕллевĕсем те пĕр евĕрлĕ вĕсен. Çанталăк шăрăх пулсан та, хальхинче кÿршĕсем «Шупашкар — 500 çул» культурăпа кану паркĕнче Акатуй-Сабантуя июлĕн 3-мĕшĕнче йышлă пуçтарăнчĕç.
Уява ентешлĕхсен ертÿçисем – А.П.Капитонов, О.Н.Викторов тата В.М.Семенов йĕркеленĕ.
Пухăннă хăнасене ЧР Патшалăх Канашĕн Председателĕ М.А.Михайловский, Комсомольски районĕн пуçлăхĕ Г.Ф.Волков, Елчĕк тата Патăрьел районĕсен пуçăлăхĕсен çумĕсем, Çеçпĕл Мишши премийĕн лауреачĕ Валери Туркай, Шупашкар хулинчи Мускав район администрацийĕн пуçлăхĕ А.Н.Петров тата ыттисем те саламларĕç. «Туслăх вăл — чи çутă та таса вăй. Кÿршĕсем пĕр-пĕринпе тĕл пулса калаçса опытпа паллашни малашнехи тĕллевсем патне ăнтăлма хăват парĕ»,— терĕ Геннадий Федорович, уява килнисене саламласа, район кучченеçĕсене сĕнсе. Сăмах май, мероприятие хутшăннисен «Кооператор» ПК продукцийĕсене тутанса пăхма та май пулчĕ.
Малалла сцена çинче ентешлĕх активисчĕсене Хисеп грамотисемпе парнесем парса чысларĕç.
Уяв программинче виçĕ районтан тухнă эстрада çăлтăрĕсем, художество пултарулăх ушкăнĕсен концерчĕ, спорт ăмăртăвĕсем, вăйăсем тата конкурссем пулчĕç.
Çак кун культурăпа кану паркĕн сцени çинче Ильдар Хисамов тата Александровка ял поселенийĕн юрăçисем хăйсен пултарулăхĕпе ентешлĕх уявĕнчи çынсене тĕлĕнмеллипех тĕлĕнтерчĕç. Концерт программине александровкăсене «Здравствуйте, гости!» юрăпа уçма шанни те вĕсене чысланипе танах тесе шутлатăп. Комсомольскисем çак уява çÿлти шайра хатĕрленнине куракансем те палăртрĕç.
Елчĕк районĕн ăсталăхне РФ тата ЧР культурăн тава тивĕçлĕ ĕçченĕ Г.Борисов ертсе пыракан Патреккелти халăх хорĕ тата Елчĕкри искусство шкулĕн коллективĕ кăтартрĕ.
Спорт ăмăртăвĕсем те пулчĕç уявра. Волейболла выляса шурутсем виççĕмĕш вырăна тухрĕç. Футбол вăййинче вара 5 командăран тĕп хуламăрти Комсомольскисен «Кĕтне» ентешлĕх команди иккĕмĕш вырăна çĕнсе илчĕ.
Çĕнтерÿçĕсене Хисеп грамотисем тата парнесем парса чысларĕç.
Источник: "Каçал Ен"