03 июля 2010 г.
Июнĕн 24—25-мĕшĕсенче Патăрьелĕнче республикăри Çуллахи ХI ял вăййисем иртнĕ. Унта пине яхăн спортсмен хутшăннă. Ял поселенийĕсем хушшинче кире пуканĕ йăтса тукайсем палăрнă, вĕсем виççĕмĕш вырăна тухнă. Спортсменсенчен çак енĕпе уйрăмах Галина Макарова, Илья Павлов, Василий Наумов тата Юрий Прокопьев палăрнă.
Армспортпа урмаелсем — Аймет Зарипов, Ильдус Табаев, Ильхам Амерханов тата Диля Салахутдинова — пултарулăх кăтартнă.
Сĕтел çи теннисĕ выляссипе вара комсомольскисем виççĕ-мĕшсем пулнă. Вĕсем — Татьяна Герасимова, Елена Васильева, Федор Гаврилов, Юрий Добросмыслов.
Ал шăллипе кĕрешекен ентеш спортсменсем те лайăх кăтартусемпе палăрнă. Çак ăмăртура Рашид Хамбиков пĕрремĕш, Ильдус Гайнутдинов иккĕмĕш вырăна çĕнсе илнĕ.
Çемьесем хушшинче вара Элпуç ял поселенийĕнче пурăнакан Давыдовсем дартс, шашка, çăмăл атлетика тата сĕтел çи теннисĕпе тупăшса çĕнтерÿçĕсен пьедесталĕн пĕрремĕш картлашки çине хăпарма пултарнă.
Ентешсем тупăшусенче ăнăçу тунинче, паллах, район администрацийĕн вĕрентÿ пайĕн тĕп специалисчĕн Е.А.Тихоновăн, ял поселенийĕсен пуçлăхĕсен тÿпи те пысăк.
Источник: "Каçал Ен"