03 июля 2010 г.
Районти Культурăпа кану центрĕ çумĕнчи «Каçал» фольклор халăх ансамбльне район çыннисем аван пĕлеççĕ. Вĕсем пĕрре çеç мар республика, çĕр-шыв шайĕнчи мероприятисене хутшăнса ырă ят çĕнсе илнĕ. Çавăнпа ĕнтĕ ăна Турци çĕр-шывĕнчи Ялова хулинче иртекен Пĕтĕм тĕнчери тĕрĕк халăхĕсен VIII фольклор фестивальне хутшăнма чĕннĕ. Ку ахальтен мар. Вăл — унта Чăваш Республикинчен каякан пĕртен-пĕр коллектив. Пирĕн ентешсем АПШ, Казахстан, Азербайджан, Иран тата Европăри чылай çĕр-шывран пынă хăнасем умĕнче хăйсене тивĕçлипех кăтартасса шанатпăр.
Вунă кун хушшинче фестивале хутшăнакансем Мрамор тинĕсĕ хĕрринче вырнаçнă курортлă хулара чылай концерта хутшăнĕç.
Фестиваль программи питĕ анлă. Коллективсемпе пĕрлех авалхи юрăсене шăрантаракан уйрăм юрăçсем сцена çине тухĕç.
Источник: "Каçал Ен"