03 июля 2010 г.
Чăваш автономине туса хунă хыççăнах 0 çулхи юпа уйăхĕнче Чăвашпотребсоюз йĕркеленнĕ. Сумлă юбилей умĕн унăн ĕçченĕсем хăйсем утса тухнă кун-çулпа чăннипех те мăнаçланма пултараççĕ.
Хальхи вăхăтра Комсомольски райповĕ Е.И.Карпеев председатель ертсе пынипе хăватлă утăмсемпе малалла аталанать. Халăх ыйтăвĕсене тивĕçтерессипе çыхăннă ĕçре пурĕ 400 яхăн çын вăй хурать. Суту-илÿ тытăмĕнче — 67 магазин. Çăкăр завочĕ те районти потребительсен обществине кĕрет. Каçал ен çыннисем, унăн хăнисем пирĕн ялсенчи хитре те хăтлă лавккасене курма хăнăхрĕç ĕнтĕ. Суту-илÿ çурчĕсене юсаса илемлетесси малалла пырать. Райпо сутуçисем тăрăшса ĕçлени куç умĕнчех. Кирек хăш ялти лавккана кĕрсен те, хуçисем ăшă кăмăлпа кĕтсе илеççĕ. Туянакана тавар суйласа илме пулăшнине, канаш-сĕнÿ панине ырламалла çеç. Халĕ райпо ĕçченĕсемшĕн уйрăмах çăмăл мар лару-тăру, мĕншĕн тесен уйрăм предпринимательсен шучĕ ÿсрĕ. Çавăнпа та сентре умĕнче тăракансен хăйсем патне халăха илĕртме чунтан тăрăшмалла. Райпо пуçарăвĕпе продавецсем час-часах семинарсенче пулаççĕ, курссенче çĕнĕлĕхсемпе паллашсах тăраççĕ. Тавара вырнаçтарасси сутуçăн тавçăрулăхĕпе пуçарулăхĕнчен нумай килет. Пирĕн калаçу çак ыйтусем тавра йĕркеленчĕ те ĕнтĕ. Райпо ĕçĕ-хĕлĕ пирки правлени ертÿçи Людмила Александровна Сорокина пĕр чарăнмасăр, хавхаланса каласа парать. Вăл, товаровед, экономист профессийĕсене алла илнĕскер, суту-илÿ тытăмĕнче 25 çул вăй хурать. Тăрăшса ĕçлекенсенчен камсене палăртма пулать тесен кăштах шухăша кайрĕ.
— Тăрăшуллисем, пултаруллисем пирĕн нумай,— тет Л.А. Сорокина. — Чылай çул ĕçлесе пысăк опыт пухнисенчен эпĕ Раиса Виссарионовна Барановăна (Хырай Ĕнел), Мария Ивановна Чульмаковăна (Кивĕ Сĕнтĕр), Антонина Петровна Иллариновăна (Йÿç Шăхаль) уйрăмах мухтасшăн. Шурут ял лавккинчи Мария Федотовна Шмелевăпа унăн хĕрĕ те, Татьяна Алексеевна, ырă ята тивĕçлĕ. Пирĕн патран пенсие тухнисем 160 çын. 11-шĕ халĕ те ĕç пăрахман-ха. Юпа уйăхĕн пĕрремĕшĕнче, Ваттисен кунĕнче, кашни çулах вĕсене хăнана чĕнетпĕр. Хисеплĕ ята тивĕçнисем те сахал мар. Кировра пурăнакан Нина Михайловна Григорьева, тĕслĕхрен, Чăваш Республикин халăх ыйтăвĕсене тивĕçтерессин тава тивĕçлĕ ĕçченĕ. Тукайри Мария Николаевна Курицына 1971 çултанпа магазинта вăй хурать. Вăл — РФ Потребкооперацийĕн хисеплĕ ĕçченĕ. Ку ярăма малалла та тăсма пулать паллах.
2010 çулхи I квартал кăтартăвĕсем районти ветеринари аптекин (заведующийĕ В.Н.Давыдов), гастрономăн (В.А.Краснова), «Кĕтне» кафен (Т.А.Чернова) питĕ лайăх. Вĕсем уйăхран уйăха плана тултарса пыраççĕ.
Професси уявĕнче халăх ыйтăвĕсене тивĕçтерекенсен кăмăл уйрăмах çĕкленÿллĕ. Юбилей вăл — хăйне май пĕтĕмлетÿсем тумалли тапхăр. Ĕçре малта пыракансене Комсомольски райповĕ чăннипех те вырăна хурса хисеплет. Пултаруллă, тăрăшуллă ĕçченсене тавар туянакансем те ăшшăн тав тăваççĕ.
Источник: "Каçал Ен"