26 июня 2010 г.
Пирĕн районта çуралса ÿснĕ çынсем хушшинче паллă çынсем чылаййăн. Вĕсем республика шайĕнче те тĕрлĕ яваплă вырăнсенче ĕçленĕ. Александр Пожеданов акă 1929-1931 çулсенче Чăваш Республикинчи потребительсен обществин союзĕн (Чăвашсоюз) правленийĕн председателĕ пулнă.
Вăл пирĕн районти Хырхĕрри ялĕнче 1897 çулхи ноябрĕн 15-мĕшĕнче кун çути курнă. Вырăс. Кĕтне Пасарĕнче чиркÿпе прихут шкулĕнче вĕреннĕ. Ун хыççăн вăл Аслă Каçал вулăс правленийĕнче писарьте ĕçленĕ.
Пĕрремĕш тĕнче вăрçине хутшăннă, кайран хăй ирĕкĕпе Хĕрлĕ çара çырăннă. Унтан демобилизаципе таврăннă хыççăн Аслă Каçал çар ĕç комиссариа-тĕнче делопроизводитель, каярахпа çар комиссарĕ, вулăс ĕç тăвакан комитет председателĕнче тăрăшнă.
1923—1925 çулсенче Патăрьел районĕн халăх сучĕн следстви участокĕн следователĕнче, Патăрьел уезчĕн ĕç тăвакан комитечĕн пĕтĕмĕшле уйрăмĕн заведующийĕнче ĕçленĕ.
1926 çулта ВКП(б) уездри парти работникĕсен çулталăкри курсне пĕтернĕ. Йĕпреç парти райкомĕнче организацилле уйрăм заведующийĕнче, парти райкомĕн секретарĕнче вăй хунă. ВКП(б) Чăваш парти обкомĕн инструкторĕнче ĕçленĕ. 1929 çулта ăна Чăвашсоюз правленийĕн председателĕ пулма çирĕплетнĕ. Вăл ĕçленĕ вăхăтра Чăвашпотребсоюз палăрмаллах çитĕнÿсем тунă. 1929 çулта Шупашкарта кооператив техникумĕ уçăлнă. Тепĕр çултан Улатăр райпоне туса хунă. Канашра районсем хушшинчи базăна хута янă.
Кайран А.Пожеданов пĕр çул вак таварсемпе суту-илÿ тăвакан пĕрлешĕвĕн республикăри патшалăх кантурĕн директорĕнче тăрăшнă. Кунта та вăл хăй пултаруллă ертÿçĕ пулнине çирĕплетсе панă.
1932—1938 çулсенче Куславкка райкомĕн секретарĕнче, ВКП(б) обкомĕн промышленноçпа транспорт пайĕн заведующийĕнче, Йĕпреç леспромхозăн директорĕнче вăй хунă.
1938 çулта А.И.Пожеданова Чăваш АССР Верховнăй Совечĕн депутатне суйлаççĕ.
1939 çулта вăл Ессентуки хулинче çĕре кĕнĕ.
Кĕске ĕмĕрĕнче вăл республикăшăн палăрмалла чылай ĕç пурнăçланă.
Источник: "Каçал Ен"