16 июня 2010 г.
Акатуй — чăвашсен авалхи чи паллă та сумлă уявĕ. Ăна çурхи ĕçсене ăнăçлă пĕтернĕ хыççăн ирттереççĕ.
Акă июнĕн 12-мĕшĕнче Комсомольски вăрманĕн Хĕр уçланкинче районти 59-мĕш ĕçпе юрă тата спорт уявĕ — Акатуй — иртрĕ. Кăçал ăна Аслă Çĕнтерÿ 65 çул çитнине тата Вĕрентекен çулталăкне халалланă.
Чи малтанах уява пуçласа район пуçлăхĕ Г.Ф.Волков сăмах илчĕ. Вăл пурне те çурхи ĕçсене ăнăçлă вĕçленĕ ятпа ăшшăн саламларĕ, малашне те ăнăçу сунчĕ. Çавăн пекех Чăваш Республикин культура, национальноçсен ĕçĕсен, инфоромаци политикин тата архив ĕçĕн министрĕ Р.М.Лизакова тухса калаçрĕ, ЧР Президенчĕн Н.В.Федоровăн саламлă Çырăвне вуласа пачĕ.
Тăван тăрăха савăнăçлă мероприятие тĕп хуламăртан ытти сумлă-чыслă хăнасем те килсе çитнĕ. Вĕсен шутĕнче — Чăваш Республикин Патшалăх Канашĕн депутачĕ, «Чăвашрегионгаз» ООО генеральнăй директорĕ К.С.Мифтахутдинов, Чăваш Енри Патшалăх статистика службин ертÿçин çумĕ П.С.Краснов, чăваш халăх поэчĕ, Çеçпĕл Мишши фончĕн директорĕ, «Кĕтне» ентешлĕх председателĕн çумĕ Валери Туркай.
Уявра сцена çинче тĕрлĕ производствăра малта пыракансене, пысăк çитĕнÿсем тунă маттур та пултаруллă çынсене, министерствăсен, район администрацийĕн Хисеп хучĕсемпе тата хаклă парнесемпе наградăланă.
Ун хыççăн художество пултарулăх коллективĕсемпе уйрăм солистсем савăк юрă-ташăпа савăнтарчĕç, кăмăл-туйăма çĕклерĕç.
Уяв программине Валентина Курицынапа Сергей Просвирнов ертсе пычĕç.
Акатуйра тĕрлĕ çĕртен килнĕ магазинсем, предпринимательсем хăйсен таварĕсене сĕнчĕç. Тутлă шашлăкпа та, тĕрлĕрен апат-çимĕçпе те туллин тивĕçтерчĕç килсе çитнĕ хăнасене суту-илÿ ĕçченĕсем.
Уяври çынсем «Алă ăстисен хулине» те çитсе курчĕç. Районти «Çĕр тата çынсем» музей ĕçченĕсем Инна Ядровăпа Алина Куракова экспонатсемпе тĕплĕн паллаштарчĕç. Унта тĕрĕ ăстисен, тăмран япала тăвакансен, эрешсем ăсталакансен, çыхакансен ĕçĕсене курса киленме те май пулчĕ.
Акă Тукай ялĕнче пурăнакан Валентина Николаевна Медведева пенсионеркăпа Алина Григорьевна Афанасьева учительницăн тĕррисене ытараймасăр уяври çынсем нумайччен пăхса тăчĕç. Вĕсемпе клуб ĕçченĕ В.Г.Никитина паллаштарчĕ. Районти икусство шкулĕнче вĕренекен ачасем те «Алă ăстисен хулинче» хăйсен тĕррисене, ăсталанă теттисене кăтартрĕç. Люда Карсакова, Алина Романова, Елизавета Кузьмина тата Владилена Мурзаева, чăваш тĕррисен кружокне çÿрекенсем, уява килнисене хăйсен ĕçĕсемпе паллаштарма пултарнишĕн хĕпĕртерĕç. «Хулара» Мария Михайловна Наумова (Çĕнĕ Мăрат), Валентина Васильевна Самаркинăпа Ольга Митрофановна Николаева (Тăманлă Выçли), Ольга Филипповна Архипова (Йÿç Шăхаль), Ольга Федоровна Ершова (Шурут-Нурăс) тата ыттисен куçа илĕртекен ĕçĕсемпе уява пухăннисен курса киленме май пулчĕ. Сăмахран, Людмила Степановна Козлова (Йÿç Шăхаль) тунă тухьясене тата хушпусене туянас текенсем те чылаййăн пулчĕç. Кивĕ Сĕнтĕр ялĕнче пурăнакан Николай Николаевич Кокшин вара пурне те тĕлĕнтермеллипех тĕлĕнтерчĕ. «Çăм арлама пĕчĕкренех пĕлетĕп. Анчах та вăтаннăран çынсен умĕнче ку ĕçпе аппаланман. Халĕ вара кĕрхи, хĕлллехи тĕттĕм каçсенче телевизор умĕнче тăрăшсах арлатăп»,— терĕ пенсионер хăйĕнпе паллаштарса. Лидия Алексан-дровна Лукиянова (Аслă Чурачăк) алă ĕçĕ тунă вăхăтра чăваш халăх юррине шăрантарса куракансен-итлекенсен куçĕсене нумайăшĕнне шывлантарчĕ.
Уявра çавăн пекех тĕрлĕ кавирсен выставки те пулчĕ. Çапла, манăçа тухмасть-ха чăваш тĕрри. Пултаруллă тĕрĕçĕсем вĕсенче тĕнче илемне, хăйсен кăмăл-туйăмне палăртаççĕ. Кавирсене тата тĕрленĕ ытти япаласене нумайччен киленсе пăхса тăма пулать. Вĕсене ăстаçă туни куç кĕретех.
Мĕнле уяв вăл спорт мероприятийĕсемсĕр? Волейболла выляса ар çынсенчен пĕрремĕшсем шурутсем, иккĕмĕшсем нĕркеçсем, виççĕмĕшсем «Кĕтне» (Комсомольски) команди пулчĕç. Комсомольски 1-мĕш вăтам шкул хĕрĕсем çак ăмăртура чи маттуррисен шутĕнче палăрчĕç, вĕсем пĕрремĕш вырăна тухрĕç. Асанкасси ял поселенийĕн тата Урмаел вăтам шкулĕн командисем иккĕмĕшпе виççĕмĕш вырăнсене çĕнсе илчĕç.
Алă вăйĕсене виçекенсенчен И.Мурзукова (Канаш районĕ) çĕнтерекенни пулмарĕ. Э.Ивановпа А.Толмачев иккĕмĕшпе виççĕмĕш вырăнсене пайларĕç.
Кире пуканĕ йăтакансен ăмăртăвĕ те интереслĕ иртрĕ. Ăна чи нумай çĕклесе В.Наумовпа (70 килограмм таранччен виçеллисем хушшинче) В.Голландцев (70 килограмран ытларах) пĕрремĕш вырăна тухрĕç. А.Кондратьев, И.Павлов, А.Андриянов тата С.Андреев призерсен шутне кĕчĕç.
Дартс ăмăртăвĕ те уява хăйне евĕрлĕх кÿчĕ. «Чи тĕл персе лектерекен» ята Евгений Кокорев (Кĕçĕн Каçал), Альберт Иванов (Комсомольски) тата Сергей Данилов (Хирти Мăнтăр) тивĕçрĕç.
Вут пуленкине пăта çапса кĕртессипе Станислав Шкаблев (Комсомольски 1-мĕш вăтам шкул) ăста пулчĕ, пĕрремĕш вырăна тухрĕ.
Ирĕклĕ майпа кĕрешекенсен ăмăртăвĕ халăха яланах йышлă пуçтарать. Кăçал та çаплах пулчĕ. Кавир çине пĕрин хыççăн тепри тухса 42, 46, 66, 74 тата 82 килограмлă виçеллисем вăй виçрĕç. Хĕрÿ тупăшусенче 42 килограмлисем хушшинче Евгений Козлов пĕрремĕш, Юрий Степанов иккĕмĕш, Роман Козлов виççĕмĕш, 46 килограмлисем хушшинче Станислав Шкаблев пĕрремĕш, 66 килограмлисем хушшинче Александр Волков пĕрремĕш, Владимир Трофимов
иккĕмĕш, Сергей Родионов виççĕмĕш, 74 килограмлисенчен Андрей Митюков пĕрремĕш, Евгений Петухов икккĕмĕш вырăнсене йышăнчĕç. 82 килограмлисем хушшинче вара Никита Крылов пĕрремĕш вырăна тивĕçрĕ.
Ирĕклĕ майпа кĕрешсе пăхаттир ятне тата такана Ильнар Зайнуллин (Тукай Мишер) çĕнсе илчĕ. Çĕнтерÿçĕсене Хисеп грамотисем тата хаклă парнесем парса чысларĕç.
Акатуй пуриншĕн те кĕтнĕ, юратнă уяв шутланнă, шутланать те.
«Россельхозбанк» АУО филиалĕн районти хушма офисĕн представителĕсем Комсомольскинче пурăнакан Коротинсен çемйине хăйсемпе тачă çыхăну тытнăшăн хур чĕпписем парнелерĕç.
Акатуйра районти муниципалитетăн ачасене хушма пĕлÿ паракан «Комсомольскинчи ачасен ÿнер шкулĕ» вĕрентÿ учрежденийĕн преподавательне Т.Е.Ивановăна «Чăваш Республикин культурăн тава тивĕçлĕ ĕçченĕ» хисеплĕ ятпа культура министрĕ Роза Лизакова саламларĕ.
Источник: "Каçал Ен"